Air Greenland: Angalasut innermik 2010-mi anitsisoqallarmalli aatsaat taama amerlatigisut kanngittoorput
Allarpassuit assigalugit aasaanerani sulinngiffeqarlutit aallarniaruit arajutsisimanavianngilat.
Timmisartummi taamaatiinnarneqartut kinguaattoornerpassuillu mittarfinni aallartussat allattorfimaffiini sapaatit-akunnerata siuliani takussaaqaat.
Timmisartut aallartussat ataasinngornermi juulip arfineq-pingajuaniit sapaammi ualeq ilanngullugu katillugit 136-t taamaatiinnarneqarput. Air Greenland KNR-imut taama paasissutissiivoq.
- Taamaatitsiinnarnerit pissutigalugit eqqugaasorpassuupput, Air Greenlandimi piujuartitsinermut attaveqaqatigiinnermullu pisortaq, Inga Dóra G. Markussen oqarpoq. Ullut arfineq-marluk ingerlaneranni taamaatitsiinnarnerit pissutigalugit angalasut 3700-t eqqugaapput.
- Soorunami inuppassuit sapaatip-akunnera kingulleq apuuppagut. Kikkut tamarmik eqqugaanngillat, ingerlariaqqissinnaanngitsulli amerlaqaat. Assut amerlapput.
Siniffiusinnaasut naammanngitsut
Timmisartut allarsinnaassappata silap qanoq innera apeqqutaajuaannarpoq. Pujoqattaarnerujussuali Air Greenlandimut sapaatip-akunnerata siuliani ilungersunatorsiortitseqaaq.
Taamaatitsiinnarnerit kinguaattoornerillu nunatsinni takornartaanngillat, juulilli arfineq-pingajuanni pisoq immikkuullarippoq.
- Angalasut kanngittooqqasut ukiorpassuit matuma taama amerlatigipput. 2010-mili innermik anitsisup arsai pititillarmatali aatsaat taama pisoqaqqippoq, Islandimi innermik anitsisartup Eyjafjallajökullip innermik anitsinera pissutigalugu timmisartut angalanerannik unititsisoq pillugu Inga Dóra G. Markussen oqarpoq.
Suliarujussuarlu aallartippoq.
- Timmisartoq kinguaattoorpat taamaatiinnarneqarpalluunniit ilaasut akunnittarfimmut allanulluunniit unnuiffiusinnaasunut inissittussaavagut. Angalasorpassuillu sumiiffimmi ataatsimuuleraangata siniffissallu naammanngikkaangata tamanna ajornartorsiutaalersarpoq.
Taamaattumik angalasut Kangerlussuarmi eqaarsaartarfimmi Ilulissanilu atuarfimmi siniffinni patitsitittakkani unnuipput.
Massakkut susoqassava?
Taamaatitsiinnarnerpassuarniilli eqqagaasorpassuit tamarmik apuuffissaminnut suli apuutinngillat sulilu utaqqisoqarluni.
Kujataa pingaartumik ajornersaavoq, ilaasussarpassuillu suli aallanngillat. Sikorsuaqarunnaameriarmallu Air Greenland Arctic Umiaq Linelu suleqatigiillutik Nanortalimmiit Nuummut umiarsuarnik amerlanerusunik avannamukartitsissapput.
Air Greenlandimi angalasut tamarmik apuuffissaminnut qaqugu anngussinnaassanersut Inga Dóra G. Markussenip eqqoriarusunngilaa.
- Angalasut tamarmik qaqugu anngussinnaassanersut suli nalunarpoq. Sila uani sapaatip-akunnerani qanoq issanersoq apeqqutaassaaq. Kitaata sineraani aqagu pujornissaa ilungersunartorsiortitsilereerpoq. Sila kisimi nalaagaavoq, taanna oqarpoq.
