Politiit ullormut nalunaarutaat: Politiit Eqalugaarsunni tillinniartoqarneranik ilisimannittussarsiortut

Eqalugaarsunni Pilersuisumut tillinniartoqarnerani pinerluuteqartut ilisimaneqanngitsut ‘aningaasarpassuarnik’ nassarlutik qimaasimasut, Kalaallit Nunaanni Politiit pigaartuisa pisortaata, Bent Johnsenip oqaatigaa.

Pinerluuteqartut allamik sumik tillissimanersut politiit piffissami matumani ilisimanngikkaat, pigaartut pisortaata oqaatigaa.

- Pinerluuteqartut pisiniarfimmut igalaaq aserorlugu isersimapput, aningaasarpassuillu nassarlugit qimaasimallutik. Allanik aamma tillittoqarsimasoq oqaatigissallugu siusippallaartoq, pigaartut pisortaata oqaatigaa.

Tillinniartoqarnera tallimanngornermi ualikkut nalunaaqutaq pingasunit arfininngornermi ullaakkut qulingiluat akornanni pisimavoq. Politiit innuttaasunit suliamut atatillugu ikioqqupput. MIsissueqqissaarnermut iluaqutaasinnaasunik arlaannik takunnittoqarsimaguni ilisimannittoqaruniluunniit Kalaallit Nunaanni Politiit 70 14 48-mut sianertoqarsinnaavoq.

Nakuuserneq siorasaarinerlu

Tamatuma saniatigut politiit angut nakuusersimasut siorasaarisimasutullu sapaatip ingerlanerani sassartissagunarunaraat Bent Johnsenip oqaatigaa.

- Sassartinneqarnissaa qaqugorpiaq piniarnersoq oqaatigisinnaanngilara, kisianni ilaatigut nakuusersimasutut siorasaaruteqarsimasutullu sassartinneqassaaq.

Angut 26-nik ukioqartoq pisorlu tamanna Nuummi arfininngornermi unnukkut pisoq pigaartut pisortaata taamaallaat oqaatigisinnaavaa.

Politiit angutip tigummigallarneqarnissaa piumasaqaatigalugu sassartinniarpaat.