Mette Frederiksenip ataatsimeeqatiginera: Naalagaaffeqatigiinneq nutarsarneqassaaq
Naalakkersuisut siulittaasuat, Jens-Frederik Nielsen aamma danskit ministeriunerat Mette Frederiksen Marienborgimi sapaammi ullaap tungaani ataatsimiipput.
Ataatsimiinnermi ‘ataqatigiinni pissutsit’ oqaluuserineqartut, Mette Frederiksenip ataatsimiinnerup kingorna Marienborgip saani tusagassiortunik katersortitsinermi oqaatigaa.
- Kalaallit danskillu akornanni pissutsit nutarsaleruttorpagut.
- Assigiinngitsorpassuit misissorpagut. Oqaluttuarisaanitsinnut nuanninngitsullu pisimasut qiviarpugut, kisianni aamma kalaallit inuiaqatigiit aningaasaqarneratalu ineriartortinnissaanut tunngatillugu siumut isiginnilluta, Mette Frederiksen oqarpoq.
Jens-Frederik Nielsenip nunat tamalaat akornanni pissutsit pissutigalugit Kalaallit Nunaatut Danmarkitullu naleqassusermik peqatigisat qaninnerulernissaat pisariaqartoq tusagassiortunik sivikitsumik katersortitsisoqarnerani erseqqissaatigaa.
- Nunanut allanut politikkikkut pissutsit pissutigalugit qaninnerulertariaqarpugut, uaguinnanngitsorli aamma allat. Naleqassusermik peqatigisagut tamarmik qaninnerulissavagut, taanna oqarpoq.
Nunatta oqaluttuarineqarnerata qiviarnissaa piffissanngortoq
Tamatuma saniatigut naalagaaffeqatigiinnerup nutarsarnissanut danskit naalakkersuisuisa isumaqatigiinniarfigilernissaat naalakkersuisunit kissaatigineqarpoq.
Danskillu tungaanniit tamanna akuersaarneqarpoq. Mette Frederiksenip namminersorneq pillugu inatsit misissornissaa nutaamillu sanasoqarsinnaanera piareersimaffigalugu oqaatigaa.
- Danmarkilu kalaallinut inuiaqatigiinnut aningaasaleerusussuseqarpoq, ministeriuneq oqarpoq.
- Allannguisoqassappat nunatta (Danmarkimut aaqq.) saniatigut aningaasartuutaaneranik oqaatigineqartarnerata misissornissaa piffissanngorpoq, Jens-Frederik Nielsen kingunitsianngua oqarpoq.
Naalakkersuisut siulittaasuat namminersorneq pillugu inatsimmik nutaamik isumaqatigiinniarnermi naalakkersuisut suna siulliunniarneraat aperineqarpoq. Taassuma tamanna erseqqissumik akissuteqarfiginngilaa, kisianni namminersorneq pillugu inatsisip misissorneqaqqinnissaata pingaassusaa erseqqissaatigaa.
Taassuma nunarput siunissamut tunngavimmik pilersitsiniarluni naalagaaffeqatigiit ilaatigut ineriartorusuttoq erseqqissaatigaa.
Suleqatigiinneq ataqqinniffiusariaqartoq
Naalakkersuisut USA-mik suleqatiginninnerulernissaq piareersimaffigineraat KNR-ip tusagassiortunik katersortitsinermi apeqqutigaa, siulittaasullu akissutaa ersarilluinnarpoq.
- Suleqatigiinnermut nukittuumut ineriartornerunissamullu piareersimavugut, kisianni ataqqineqarusuppugut. Kimilluunniit pisiarineqarsinnaasunngunngisaannassaagut, Jens-Frederik Nielsen oqarpoq.
Danskit ministeriunerata naalakkersuisut siulittaasuat peqatigalugu USA-p præsidentia Trump ataatsimeeqatigerusunneraat apereqqutigineqarpoq.
- Amerikamiut præsidentiat ataatsimeeqatigerusuttuaannarparput, Mette Frederiksen oqarpoq, tamannalu Jens-Frederik Nielsenip isumaqatigaa.
Jens-Frederik Nielsen Danmarkimut aqagu tungaanut tikeraarpoq, aqagulu Kunngi Frederik peqatigalugu angerlamut uteqqissalluni.
