Sila timmisartuussinermut unammillernartorsiortitsisoq: Angalasussat atuarfinni eqaarsaartarfinnilu unnuisut

Nunatsinni timmisartuussiniarneq ullut tallimassaannik unammillernarpoq. Kangerlussuarmi Ilulissanilu angalasussarpassuit inissiffissaqarnissaannut nutaaliorluni aaqqiissuteqartoqartariaqarpoq.

Timmisartuussinissanik ataasinngormalli taamaatitsiinnarnerpassuit kingunerisaanik ilaasussat 2600-it eqqugaaqqasut, Air Greenland piujuaannartitsinermut attaveqaqatigiinnermullu pisortaa, Inga Dóra G. Markussen KNR-imut paasissutissiivoq.

- Sapaatip akunneranut timmisartuuttakkagut 15.000-it missaanniipput, taamaammat amerlapput, taanna oqarpoq.

Air Greenlandip Københavnimit Kangerlussuarmut ullumikkut timmisartuussinissaq taamaatinniarlugu aalajangerpaa, angalasussat taamaalillutik aallarneq ajuleqqassanatik. Taarsiulluguli timmisartoq Narsarsuarmut ingerlassaaq, tassanilu missinnaanissaa neriuutigaat. Piujuartitsinermut attaveqaqatigiinnermullu pisortaq, Inga Dóra G. Markussen paasissutissiivoq. Assi © : KNR / Johasinnguaq Olsen

Taamaammat unnuiffissanut tunngatillugu immikkut ittumik aamma iliuuseqartoqartariaqarpoq. Angalasussat ilaat Kangerlussuarmi timersortarfimmi siniffinni angallattakkani sinittariaqarput, Ilulissaniillu angalasussat unnuiffissaqartinniarlugit atuarfik atorneqartariaqarluni.

- Inissiigasuarnissamut aaqqiissuteqarniarnermik aallartitsineq suliassarujussuusarpoq, kisianni taama pilersaaruteqartariaqarpugut. Pingaartumik amerlasuunik aallarneq ajuleqqasoqartarfiusumi Ilulissani Kangerlussuarmilu ajornartoornermi inissiiffinnik atuisariaqartarpugut, Inga Dóra G. Markussen oqarpoq.

Taassuma taamaatitsiinnarnerit taama amerlatigitillugit Narsarsuaq pingaartumik aamma unammillernartoq oqaatigaa.

Ullunut annerpaamik pingasunut isumalluuteqartut

Inga Dóra G. Markussenip silap pissusia timmisartuussinermut unitsitsigaangat assigiinngitsunik aallartitsisoqartartoq paasissutissiissutigaa.

- Silap maannakkutulli issinnaanera misilittagaqarfigaarput, taamaammat saniatigut aamma isumalluuteqarpugut. Umiatsiaqarpugut, saniatigut timmisartumik qulimiguulimmillu peqarpugut, kisianni taakku ullunut pingasunuinnaq naatsorsuussaapput.

- Piffissamili matumani piffissami sivisuumi taamaappoq, taamaammat amerliartuinnartut sunnerneqarput, taanna oqarpoq.

Taamaammat sulisut unammillernartunut nutaamik aaqqiissuteqarniarneq pissutigalugu ullut tamaasa immikkut ittumik ataatsimiittaarput.

- Maannakkut immikkut ittumik pisoqarpoq. Torersaanerput sapaatip akunnerata tulliani immaqa naammassissavarput, Inga Dóra G. Markussen, oqarpoq, taassumalu naammagittartoqarnissaa kaammattuutigaa.

Angalasussat eqqugaasut paasissutissanik nutaanik mailikkut nassinneqassapput.

Kangerlussuarmi inuit eqaarsaartarfimmi siniffinni angallattakkani sinittariaqarput. Assi © : Privat