Canadami filippinerit aqqusinermi nalliuttorsiorneranni ikinnerpaamik qulingiluat aporneqarlutik toqutaasut

Canadami illoqarfissuarmi Vancouverimi biili aqqusinermi nalliuttorsiorfiusumiittunut ingerlanerani inuit qulingiluat ikinnerpaamik toqutaasut arlallillu ajoqusersimasut nalunaarutigineqarpoq.

Vancouverimi politiit inoqutinut attaveqaatikkut X-ikkut danskit nalunaaqutaat naapertorlugu sapaammi ualikkut paasissutissiipput.

Angut 30-nik ukiulik aporaareernermi kingorna tigusarineqarpoq. Taanna Vancouverimi najugaqarpoq politiiniilli ilisimaneqareertuulluni, aviisi Globe and Mail allappoq.

Politiit danskit nalunaaqutaat naapertorlugu sapaammi ullaakkut paasissutissiisoq, Reuters allappoq.

- Pisumi peqqarniisaartoqannginnerani piffissami matumani ilimagaarput, Vancouverimi politiit X-ikkut allapput.

Paasissutissiineq itisilerneqanngilaq.

Sumiiffimmit qimaariaraluartoq

Tusagassiorfik Vancouver Sun naapertorlugu sumiiffimmi napparsimmaveqarfik pinerluttuliornermi eqqugaasorpassuarnut piareersimaqquneqapallassimapput.

Ajoqusersimasut qanoq amerlatigineri suli paasissutissiissutigineqanngilaq.

Inoqutinut attaveqaatini videot inuit timaat aqqusinermi siaruaqqasut takusineqarsinnaapput, inuit arlallit ikiueqqaarfigineqartut, tusagassiorfiup siusinnerusukkut allappaa.

Pisumi takunnittut biili aqqusinermut nerisassallerfinnik ulikkaartumut ingerlannginnerani motoria aallarsartinneqarsimasoq oqaatigaat.

Tassanilu inuppassuit aporarlugit uninnani siumut ingerlarsorsimavoq.

Biili unimmat angut qimaariaraluartoq, takunnittut tusagassiorfimmut oqaatigaat.

Nalinginnaasumik assersorneqartaraluartoq

Politiit pisoq ajutoornerunersoq piaaraluniluunniit iliuuserineqarnersoq politiit oqaatiginngilaat.

- Misissueqqissaarnerup ingerlanerani paasissutissiinerujumaarpugut, politiit paasissutissiipput.

Fraser Street aamma 41st Avenuep akornanni aqqusinermi pisoq sumiiffimmi nalunaaqutaq unnukkut arfineq-pingasut qaangilaaraa pisoq, politiit nalunaarutigaat. Tassa danskit nalunaaqutaat naapertorlugu sapaammi ullaakkut tallimat qaangilaaraa.

Aqqusinermi nalliuttorsiorneq Lapu Lapu Day Block Partymik taaguuteqartoq, Vancouver Sun allappoq. Nalliuttorsiorneq tamanna illoqarfimmi filippinerinit aaqqissuunneqartarpoq.

Illoqarfimmi nalliuttorsiortoqaraangat aqquserngit biilersuarnik nalinginnaasumik assersorneqartaraluarput, arfininngornermili taamaaliortoqarsimanani, tusagassiorfik allappoq.

Borgmesteri qisuariaateqartoq

Vancouverimi borgmesterip, Kim Simip nutaarsiassaq inoqutinut attaveqaatikkut X-ikkut qisuariaateqarfigaa.

- Lapu Lapumi pisoq annilaarnartoq pillugu tupaqqallungalu aliasuppunga.

- Sapinngisarput tamaat annerusumik paasissutissarsiniarsarivugut. Vancouverimi politiit inuit qassit toqusimanersut qassillu ajoqusersimanersut piffissami matumani uppernarsaraat, borgmesteri X-ikkut allappoq.

- Eqqugaasut tamarmik Vancouverimilu filippinerit piffissami matumani ilungersunartumi eqqarsaatigaagut, borgmesteri allappoq.

Canadami ministeriuneq, Mark Carney aporaasoqarnera aliasuutigalugu X-ikkut danskit nalunaaqutaat naapertorlugu sapaammi ullaakkut allappoq.

- Filippinerit-canadamiut inuiaqatigiit, Vancouverimiittut, toqutaasut ajoquserneqartullu tamarmik qanigisaat misiginneqatigingaatsiarpakka, taanna oqarpoq.

- Tamassi aliasoqatigaassi.