B52-ip nakkarneranit ukiut 50-it qaangiunneri nalliussineqarpoq
Nunatta oqaluttuarisaanerani ukiut 50-it matuma siorna tupaallaatigineqaqisumik pisoqarpoq. Taamanikkut timmisartoq B52 Pituffiup eqqaani ajutoorluni nakkarpoq.
Nakkarfiusimasumilu saleeqataasimasut Middelfartimi akunnittarfimmi Hotel Parkimi sapaatiuppat imminnut assammeqatigiiittussanngorput.
Amerikamiut timmisartorsuat B52 qaartartunik usisoq Pituffiup kujataata-kitaani 14-t kilomiiterinik ungasitsigisumi 1968-imi jannuaarip ulluisa 21-anni nakkarpoq.
KGH-imi Kongelige Grønlandske Handelimi sulisuusimasoq, Jens Zinglersen timmisartorsuup nakkarfianut apuuteqqaartut ilagaat. Saleeqataasimasullu ilaata pisoq puigunngisaannarpaa
- Sikusimanera kusanarluinnartoq nikorfallunga isiginnaarpara, nipaaqaaq taarlunilu, ullorissallu ersareqaat. Timmisartulli mikkiartorlutik apparsarfigisartagaata tungaaniit sikumi qaartumik takoriataarpunga.
KGH-imi Kongelige Grønlandske Handelimi sulisuusimasoq Jens Zinglersen taama oqarpoq
AAMMA ATUARUK Øjenvidne har stadig ubesvarede spørgsmål til Thuleulykken
Timmisartorsuaq nakkartoq Baffinnip kangerliumarnganut ingerlaartilluni ikuallalerpoq, timmisartumi sulisut arfineq marluusimapput, aquttarfillu ikuallalermat sulisut arfinillit timmisartumi issiaviit ajunaalernermi kaanngartinneqarsinnaasut atorlugit imminnut aannaapput.
- Kinguninngualu nipitoorujussuarmik qaarpallattoqarpoq, nikorfaffinnilu isikkakkut tamanna malugisinnaavara. Ikuallattorujussuanngorpoq, soorlu ikummassaammik ikitsisoqartoq, ikuallattoq portusuumik mittarfiup tungaaniit naarallattartoq, 83-inik ukiulik Jens Zinglersen KNR-imut taama oqaluttuarpoq.
Jens Zinglersen taama oqarpoq
Timmisartorsuaq brintimit qaartartulianik sisamanik usisanik ikkussuiffigineqarsimavoq, timmisartorsuarlu nakkarmat qaartartut pingasut aserorsimapput, atortukullu radioaktivinik tassa qinngornernik navinartoqartullit nakkarfiusumut siaruaassimallutik.
Timmisartoq nakkatsiaannartoq Pituffimmi sulisut piniartullu timmisartorsuup qaartartullu sinnikuinik saliiartortinneqarput.
Saliisimanerup kingunerisaanik suleqataasimasut ukiut ingerlanerini kræftimik nappaateqarlersimapput timimikkullu innarlersimanngikkunik ilaasa toqqutigisimavaat.
AAMMA ATUARUK "Idealisten" naliliisartunit tigulluarneqartoq
Saliisimaneq pillugu tusagassiortoq qallunaaq Poul Brinck qaqilerivoq, saliisimanerullu kingunerisimasai saqqummiunneqarsimanngitsut pillugit saqqummiussilluni.
Saliisimasut taarseeqqusinissaq anguniarlugu pisortanut ukiorpassuit sorsoreerlutik 1995-imi 50.000-t koruuninik taarsiiffigineqarput.
AAMMA ATUARUK Avanersuarmi pisimasoq filmiliarineqalersoq
AAMMA ATUARUK Isornartorsiuisut: Pituffimmi sulisartut napparsimalersimanerannik oqaluttuaq unitsinneqarli
