"Idealisten" naliliisartunit tigulluarneqartoq
Timmisartup B-52-ip Pituffiup eqqaani 1968-imi nakkarneranut atatillugu tusagassiortup Poul Brinkip Amerikamiut qallunaallu oqartussaasuisa Pituffimmi atombombeqarneranik isertuussinerisa qaqilerniarneqarnerannut qasusuilluni suliaqarnera, filmimi oqaluttuarineqarpoq.
Filmi tigulluarneqartoq
Filmimik ilisarititsinerit ullumi aviisini siullerni allaaserineqartut pitsaasumik allaaserinnipput.
Filmimik ilitsersuisoq Christina Rosendahl, ilitsersuisutut imminut tatigisutut assitalersuillaqqissutullu Berlingskemi allaaserineqarpoq, filmilu periarfissanit arfiniliusunit tallimanik ulloriannatsillugu.
Jyllands-Postenip periarfissanit arfiniliusunit filmi tallimanik ulloriannatsippaa.
DR-ip filmimik ilisarititsisuata oqaatigaa, Idealisten asseqanngitsutut taaneqarsinnaasoq, qallunaat pissanganartuliaat nutaaq, periarfissanillu arfiniliusunit tallimanik aamma ulloriannatsillugu.
Ekstra Bladet allappoq, Idealisten Danmarkip oqaluttuarisaanerani pisimasut alianartut ilaanik pitsaasumik oqaluttuartuusoq periarfissanillu arfiniliusunit sisamanik ulloriannatsillugu.
Atuagassiaq filminik allaaserinnittartoq Ekko pitsaannginnerulaartumik ilisarititsivoq:
- Christina Rosendahlip filmiliaani ajugaassangatinneqanngitsoq illersorneqarpoq, issuaanerilli pineqarpallaaleraangata filmi oqaluttuartutut pitsaavallaartarani, filminik allaaserinnittartoq allaappoq Idealistenilu periarfissanit arfiniliusunit pingasunik ulloriannatsillugu.
Illoqarfinni pingasuni takuteqaarneqalersoq
Filmi "Idealisten" Nunatsinni illoqarfinni pingasuni ullumi tamanut takuteqqaarneqassaaq. Tassa Nuummi Katuami, Ilulissani Biffenimi aamma Sisimiuni Taseralik Bio-mi takutinneqassagami.