Kalaallit filmiliaat Canadami Oscarinnappoq
Inersuarmi silaannaq pilluaammersimaarnermik ulikkaartutullusooq ippoq, kalaallit filmilioqataaffigisaat, piviusulersaarut Twice Colonized – Canadian Screen Awards agguaanneqarmat piviusulersaarusiat torrallataanerpaartaattut toqqagaammat.
Canadami filmilinut nersornaasiuttagaq USA-mi Oscarinnatsitsisarnermut assersuunneqarsinnaasoq, Canadami toqqaannartumik pisarpoq.
Persuarsiorpalaartumik nersornaasiineq illoqarfissuarmi Torontomi pimmat, Twice Colonized-imik ilitsersuisoq Lin Alluna najuuppoq.
Aaju Peterlu ajugaasutut toqqagaanertik pillugu marluullutik tupaallassimaqalutik, KNR-imut oqaluttuaraat:
- Assut killitsinnarpoq. Salamisnackitoorujoorpugut kusanarpallaanngitsutullu misigigunartunga. Ajugaannginnissarput piareersimaffigereerparput. Kisianni tassanngaannaq tusaavarput uagut filmiliarput ajugaasutut taaneqartoq. Misigisaq naassuiarsinnaanngilaraluunniit. Taaneqaratta periusissaaruttutut misigeqqaaraluarpugut, oqarpoq.
Filmimi inuttaasoq Aaju Peter, Kalaallit Nunaanni, Danmarkimi ukiorpassuarnilu nunagisaani Canadami, nunarsuatsinni nunap inuiisa pisinnaatitaaffiinik suliniuteqarluni sulinera, ukiuni arlalinni malittarineqarpoq.
Aaju meeraagallarami Kalaallit Nunaanni ilaquttani qimallugit Danmarkimut aallartitaavoq. Tappavaniitilluni oqaatsit ilitsoqqussani kulturitoqqanilu puigorpai. Taamaammat inersimasunngorami issittormioqatitsinnut Canadap avannaanut nunasivoq, tassanilu naggueqatigiit inuit ilaasa aamma nunasiaataasuni najugallit qanoq pineqartarnerat misigeqqillugu.
Aajup sapiissuseqarnera qujassutigigaat
Lin Alluna oqaluttuarpoq, filmip piviusulersaarusiap immiunneqarnerata nalaani assorujussuaq aporfissaqartarsimallutik allaallu immiussatik naammassiniarlugit marullunni maakkartarsimallutik. Taamaattumik inersuarsuarmi qillalaarlunilu uisorilasutut ittumi oqaluttarfimmut qaqinertik upperiuminaassimanerarpaa.
Ataqqiniarneqarneq ilitsersuisumut, Twice Colonized suliarigamiuk aatsaavissuaq piviusulersaarummik suliaqarsimasumut, immikkut ajugaanertut misinnarsimavoq. Taama oqaraluarluni ataqqinaammik annerpaamik pisussaq tassaanerarpaa Aaju Peter.
- Maligassiuisunik, misigissutsikkut ikiligaasimagaluarlutik sapiissuseqarlutik aqqusaarsimasaminnik oqaluttuarsinnaasunik, pisariaqartitsivugut. Aaju filmiliarineqarnermini taamaattuuvoq. Inuunermi aqqusaarsimasat, ammasumik oqaluttuarissallugit qaqugukkulluunniit ajornartarput sakkortullutillu. Kisianni nersorinnissummik taamaattumik pilluni, suliarput ilungersunartoq inunnik attuisimasoq paasillugu assut pissatsinnarpoq. Tupinnaannarpoq, Lin Alluna oqarpoq.
Filmimi inuttaasumut, piviusulersaarusiup inunnut allanut qanoq isumaqartigisimanera paasillugu aamma nuannernerpaasimavoq.
- Piviusulersaarusiaq una aqqutigalugu inupparpassuit attorneqaatissaannik tunisimavagut - naggueqatigiit inuit kisiisa pinnagit, nunarsuarmili inuit allat aamma. Tamanna assut qutsatigaara, Aaju Peter tusagassiorfinnut nalunaarummini oqarpoq.
Kikkulluunniit allanngueqataasinnaasut
Filmip siunertaa tassaavoq, kinaagaluaraanniluunnit nunaqarsuatsinni isumaqarlunilu allannguinermut sunniuteqarsinnaavoq. Taamaammat Lin Allunamut assut nuannersimavoq, inuit assigiinngitsut filmi takoreeraangamikku – Aaju Peter tarrarsorfigisinnaasutut misigalugu oqaluttuartarmata.
- Aajup inuunera ajornaatsuinnaasimanngilaq, taamaakkaluartoq qitornami taakkulu qitornaasa isumagiuarnissaat salliutittarsimavaa, nunarsuatsinnilu arlaatigut pitsannguutaasumik suliniuteqartuarusuttuartuullugu. Filmi takutikkiartorlugu angalagaangatta arlallit, Aajup oqaluttuarisai ilisaralugillusooq, nammineq oqaluttuassartatik Aaju orniarlugu oqaluttuarisarpaat, oqaluttuarpoq.
Twice Colonized Kalaallit Nunaanni suli takutinneqartarpoq, Inuit Pisinnaatitaaffii Pillugit Siunnersuisoqatigiit sulinerminni atorluartarmassuk.
Filmip taama eqqarsalersitsisarnera nunap inuiisa atugaasa siunissami pitsanngoriartuinnarnissaannut suliniuteqarnermut iluaqutaanissaa aamma neriuutigaat.
- Aaju oqarpoq, qanga pereersimasut pillugit tikkuartuisoqartariaqanngitsoq, kisianni oqaloqatigiissutigisariaqartut. Taamaaliornermi siunissaq pitsaanerulersinniarlugu alloriarnerussaaq, Lin Alluna naggasiivoq.
