Kalaallit danskillu isiginnaagassiaat pisimasuinnik tunngavilik Robertimut innersuunneqartoq
Isiginnaagassiaq piviusuinnik tunngavilik Danmarkimi isiginnaagassianut ukiumoortumik nersornaasiinissamut Robertimut innersuunneqarpoq.
Isiginnaagassiat katillugit tallimat immikkoortumut tassunga innersuunneqarput. Kina nersornaaserneqassanersoq danskit isiginnaagassiamut Robertimik 2024-mi februaarip pingajuani paasinarsiumaarpoq.
Kalaallit danskillu isiginnaagassiaat "Twice Colonized" USA-mi Utah-mi 2022-mi Sundance Film Festivalertoqarnerani takuteqqaarneqarpoq.
"Twice Colonized" danskimit, Lin Allunamit ilitsersuiffigineqarpoq, tassanilu kalaaleq inuit pisinnaatitaaffiinik sorsuutiginnittoq, Aaju Peter Issittumi tamarmi naggueqatigiinnik inunnik sorsuutiginninnera malinnaavigineqarpoq.
Isiginnaagassiami Aaju Peterip nunatsinni, Danmarkimi maannakkullu najugaqarfigisaani nunagisaani nutaami Canadami sulinera malinnaavigineqarpoq, taassumalu naggueqatigiit inuit pisinnaatitaaffii nunagilersimasaminit sorsuutigai.
Aaju Peter meeraalluni nunatsinni ilaquttaminit Danmarkiliartinneqarpoq. Taassuma ilitsoqqussaralugu oqaatigini kulturilu annaavai. Taanna inersimasunngorami Canadap issittortaanut nuuppoq, tassanilu naggueqatigiit inuit nunasiaataatigineqarnerat aamma misigivaa.
Isiginnaagassiaq CPH:DOX-imi aamma Nuuk International Filmfestivalimi 2023-mi aamma takutinneqarnikuuvoq.
Robertimut innersuussinerit saqqummiunneqaqqammerluinnarput, tassani Nikolaj Arcelip Danmarkimi nuna naggorissarneqanngitsoq pillugu isiginnaagassiaa, ”Bastarden” 14-inik innersuunneqarpoq, DR-illu nageqattaartuliaa "Carmen Curlers 2" arfinilinnik innersuunneqarluni.
Tamatuma saniatigut dronning Margrethe innersuunneqartunut ilaavoq. Taassuma Bille Augustip isiginnaagassiaani "Ehrengard - Forførelsens kunst"-imi suliaqarnini innersuunneqaatigaa, immikkoortunilu Årets Scenografimi aamma Årets Kostumedesignerimi innersuunneqarluni.
