Kalaallit danskillu filmiliaat festivalimi ataqqisaasumi takuteqqaarneqassasoq

Filmi piviusulersaarut, "Twice Colonized", kalaallinit danskiniillu suliarineqartoq, USA-p ilaani Utah-mi januaarimi Sundance Film Festivalertoqarnerani ataqqiniarneqartumik takuteqqaarneqartussanngorpoq.

Filmilu taanna nunat tamalaat piviusulersaarusianik USA-mi unamminerinut taamaalilluni ilaatinneqartussanngorluni.

Filmimut tassunga ilitsersuisuuvoq danskeq, Lin Alluna, piviusulersaarummilu oqaluttuarineqarpoq kalaaleq arnaq Aaju Peter inuunermini nuna issittoq tamaat najorlugu inuit pisinnaatitaaffii pillugit sorsuuteqartuartuunera.

AAMMA ATUARUK Kulturikkut tapiissutit: Kalaallit filmiliaat 1,5 millioninik aningaasaliiffigineqartoq

Filmimi Aaju Piitap nunatsinni, Danmarkimi maannalu najugarisamini Canadami sulinera malittarineqarpoq, suliaalu tassaalluni nunap inuiisa pisinnaatitaaffeqarnerisa nunarsuarmi tamarmi paasineqarnissaat.

- Filmi piviusulersaarusiarput ukiuni arfineq-marlunni suliaraarput, Aajulu ingiaqatigiissimaqaagut aqqutaani illartaqalutalu aammalu qiasarluta, taamaammat USA-mi taamatut nersorniarneqarluni takuteqqaarniarneqarnissaa tuppallernaqaaq, filmimi ilitsersuisoq Lin Alluna tusagassiutinut nalunaarummi ilaatigut allappoq.

Sundance Film Festival 2023 USA-mi januaarip 19-ianiit 29-iata tungaanut pisussaavoq.