Isornartorsiuisut: Pituffimmi sulisartut napparsimalersimanerannik oqaluttuaq unitsinneqarli
Innuttaasut peqqissusaannik naalagaaffiup misissuisoqarfiani ilisimatusarnermut pisortaasoq, professori Knud Juel, nakorsaaneq Jens Peter Johansen aammalu inunnik isumaginninnermi siunnersortaasimasoq Gunvor Auken aviisimi Politikenimi ullumi taama allaaserisaqarput.
Taakku isornartorsiorpaat danskit filmiliaata "Idealistenip" timmisartup nakkarnerata kingorna ukiut qulikkuutaat qaangiunnerini sulisartut saleeqataasimasut arlallit amikkut assigiinngitsunik nappaateqalersimanerannik kræfteqalersimanerannillu ersitsinera, napparsimalersimanerallu saliinermut toqqaannartumik attuumassuteqarnerarlugu.
AAMMA ATUARUK "Idealisten" eqqarsalersitsisoq takuteqqaarneqalersoq
Tamanna eqqortuunngitsoq oqaatigaat. Pituffimmimi sulisartut timmisartup qaartartunik usillip nakkarnerata kingorna qinngornernik ulorianartunik sunnerneqarnermikkut peqqissutsimikkut innarligaasimanerat uppernarsineqarsimanngisaannartoq isumaqarput.
Filmimik ilitsersuisup Christina Rosendahlip filmip sapinngisamik oqaluttuarisaanermut naapertuuttumik oqaluttuarinissaanik oqaaseqarsimanera taamatut isornartorsiuinerannut tunngaviuvoq.
Saleeqataasimasulli nappaataannik misissuinerit - timmisartup nakkarnerata kingorna ingerlanneqartut aammalu oqartussaasut peqqissutsimik misissuinernik ingerlatsisimanerannik kingusinnerusukkut misissuinerit arlaannaalluunniit uppernarsarsinnaasimanngilaat Pituffimmi sulisartut, kalaallit piniartut najukkamilu innuttaasut qinngornerit ulorianartut pissutigalugit peqqissutsimikkut innarlerneqarsimasut, isornartorsiuisut taama allaaserisaqarput.
Tusagassiuutilli Pituffimmi sulisartut napparsimalersimanerat tamatumunngalu tunuliaqutaasoq eqqunngitsumik tunngavilimmik oqaluttuarisimavat, filmilu "Idealisten" aamma taamaaliortoq, isumaqarput.
