"Idealisten" eqqarsalersitsisoq takuteqqaarneqalersoq
Amerikamiut timmisartuat B-52 qaartartunik sisamanik usilerluni Pituffimmi Januaarip 21-ianni 1968-imi nakkarpoq.
-Sila tarrajukkaluarluni isiginiarfigissoq kangerliumanermut isiginnaarujoortillunga timmisartoq uanut qaneqaluni nakkartoq takulerpara, Jens Zinglersen KNR-imi suleqatitsinnut Helle Nørrelund Sørensenimut taama eqqaamasalersaarpoq.
Aamma atuaruk "Idealistenip" takuteqqaarneqannginnerani Pituffimmi ajutoorneq paasisaqarfigiuk
Jens Zinglersenip, taamani pisoqarmat Pituffimmi KGH-imi aqutsisuusimasoq takunnittuusimasorlu, timmisartoq 1968-imi nakkarmat misigisani oqaluttuarai.
Pissanganarluinnartoq
Filmi nuanneqaaq, pissanganaqaaq aammalu paasisaqarnaqaaq.
Tusagassiortoq Poul Brink filmimi ilisaritinniarneqarpoq, taassuma pisoqarsimanera qulaajarniarsimavaa.
Taamanimi pisoqarmat saleeqataasimasut suliamik peqqissutsiminnut kingunerisinnaasaat eqqumaffigineqarsimanngimmat paasillugu assut eqqarsarnartoqarpoq.
Tassami taamani danskit suliarsartut timmisartup qinnngulanernik ulorianartunik akoqartumik usisup nakkarfiani saliinerisa kingunerisimavaat, amerlanerit amerluttunngornerat. Timmisartorsuup nakkareernerani nakkarfianilu saliisoqareernerani Pituffimmi suli ilumut qaartartoqarnersoq Tusagassiortup filmimi ilisaritinneqartup uteriiserluni pasiniarsaraa.
Kalaallinut soqutiginaateqartoq
Filmip Katuami takuteqqaarneqarneranut peqataasoq Minik Lynge isumaqarpoq isiginnaagassiaq nunatsinnut soqutiginaateqartoq, naalli filmi Pituffimmi pisimasumut tunngagaluartoq, nunatsinneersunik peqataasukinnera apeqquserlugu.
- Eqqarsaatigilluarutsigu nuna naalagaaffiit pissaanerit marluk akornanni pisut tassani eqqartorneqaramik. Kisianni soorunami eqqarsarnartoqarsinnaavoq kalaallit tungaaninngaanniit filmimi ilaasoqannginnera. Ataatsimut isingalugu filmi suliarilluagaasutut oqaatigerusuppara, Minik Lynge oqarpoq.
Filmili amigaateqartikkaluarlugu, oqallitsitsinermik pilersitsitsisinnaasoq, Minik Lynge isumaqarpoq.
- Tassa nunatta naalagaaffeqatigiinneranut iluani pisunut assut attuumassuteqarluarnera taanna assut oqaluttuassartaqarneralu assut soqutiginarpoq, Minik Lynge oqarpoq.
Unnugu isiginnaagassiaq piviusumik tunngavilik Idealisten Nuummi Katuami unnukkut arfineq marlunut takuteqqaarneqassaaq, isiginnaagassiamullu ilitsersuisuuvoq Christina Rosendahl.
