Politikki Avatangiisit

Pituffimmi ajutoortoqarneranut atatillugu apeqqutit suli akissutisineqanngillat

Filmi "Idealisten" Nuummi, Ilulissani Sisimiunilu tamanut unnugu takuteqqaarneqassaaq. Filmi 80-ikkunni pisimasoq, amerikamiut timmisartuat brintimik qaartartunik sisamanik usisalik Pituffiup eqqaani nakkartoq tusagassiortup Poul Brinkip uleerpaa. Kisiat timmisartoq nakkaqqammernerani susoqarpa?

Allattoq Ivik Kristiansen, Helle Nørrelund Sørensen

apriilip 09-at 2015 16:13

Pituffimmi amerikamiorpassuaqaleriataarnera isiginnittuusup timmisartumi aserornikumilu aniguisunik ujarlersup Jens Zinglersenip eqqaamavaa.

- Amerikamiut sukkasoorujussuarmik qisuariarput. Atortorissaarutitik aamma sakkutuut immikkut suliallit 800-t tikillugit akunnerit arfineq-pingasut qulingiluat ingerlanerani tikiupput.

Isiginnittuusoq Jens Zinglersen oqarpoq, nangillunilu oqaluttuarluni annaassiniaareerluni angerlamut apuukkami sakkutuut naalagaannit, nalunaarfigineqarnissaminut utaqqisumit, utaqqineqarluni. Sakkutuut naalagaat sakkutuunik hunnorujulikkaanik iluarsaassisussanik angalaqateqarsimavoq.

Aamma atuaruk "Idealisten" naliliisartunit tigulluarneqartoq

Qallunaat immikkut suliallit aamma tikiupput.

- Atomip nukinganut immikkut ilisimasallit Risøminngaaniit tikiupput. Plutoniumip qinngornera uloriananngitsoq, pappiaqqamillu asserneqarsinnaasoq, taakku oqarput, Jens Zinglersen oqaluttuarpoq.

Taassumali ulorianartumik qinngornilimmik uuttuinerup takutitaa upperineruaa.

- Ulorianartunik qinngornilimmik uuttuinermi 2 millionit counts per minutsiusoq uuttuutip takutippaa. Atortup uuttuisinnaaneranut tassa killinga. Sakkutooqarfiit ulorianartunik qinngornilinnik 450 counts per minut qaangeraangamikku saliiartortarput. Sumiiffiit ilaanni ulorianarluinnartumik qinngorneqarpoq.

Jens Zinglersen oqarpoq.

Aamma atuaruk VIDEO "Idealistenip" takuteqqaarneqannginnerani Pituffimmi ajutoorneq paasisaqarfigiuk

Timmisartoq brintimik qaartartunik usilluni Pituffiup eqqaani nakkarpoq Poul Brinkip qulaajaanerani ukiut qulit sinnereeraalu aatsaat paasineqarpoq.

Taamaakkaluartoq suli isertuussisoqartoq, Jens Zinglersen isumaqarpoq.

- Sakkut ulorianartumik qinngornilimmik qanoq imaqartiginerisa Danmarkimi Kalaallit Nunaannilu innuttaasuinut paasissutissiinissaq tulluaannarpoq. Qaartartut uran 235-mik, tritiumimik aamma plutonium 239-mik imaqarput. Qaartartut brintimik imaqartut taakkuninnga qanoq imaqartiginersut paasinikuunngilarput. Qaartartullu sisamaapput, Jens Zinglersen oqarpoq.