Avanersuarmi pisimasoq filmiliarineqalersoq
Filmi filmiliaritittartunit ilisimaneqarluartunit peqataaffigineqassaaq, soorlu Søren Mallingimit, Nikolaj Cederholmimit Helle Hertzimillu.
Oqaluttuassartaa filmimi malinneqassaaq. Timmisartup nakkarneranit ullualunnguit qaangiuttut Danmarkimi Amerikamilu naalakkersuisut nalunaarutigaat, ajutoorneq nakktuigineqartoq ernummatigisariaqanngitsorlu - matumani qallunaat oqartussaanerat atomimillu sakkussiaateqarnermut tunngasut eqqarsaatigalugit aamma qinngornernut ulorianartunut ernummatissaqanngitsoq oqaatigineqarluni.
Sakkutooqarfimmi sulisartut qallunaat hunnorujulikkaat, saliinersuarmut peqataatinneqalerput, qaammatillu arfineq pingasut qaangiummata timmisartup sequmilluinnarsimasup sinnikui apullu plutoniumimit mingutsinneqarsimasoq piiarneqarput. Pisimasoq taamaalilluni toqqortarineqarsinnaanngorpoq.
Pisimasup kingornagut ukiut 18-it qaangiutereersut, tusagassiortup inuusuttup radioqarfimmi sulisuusup Poul Brinkip Pituffimmi sulisartuusimasoq malinnaaffigilerpaa. Sulisartup taassuma oqaatigaa, suleqatimi amerluutai saleeqataasimaneranit pinngortuusut. Sulisartut saleeqataasimasut assingusunik nappaateqartut paasinarsivoq ilaallu sumi tamaaniittut kræftimik toqquteqartalerlutik.
Tusagassiortoq atsiullugu filmip taaguutigissavaa "Idealisten", kalaallisut "Anguniagalimmik" taasinnaasarput. Filmiliornermut 20,5 millionit koruunit atugassanngortinneqarput. Christina Rosendahl filmiliornermi ilitsersuisuussaaq filmillu filmertarfinni aappaagu aggustimi takutinneqarnissaa naatsorsuutigineqarluni.
