Avaaraq Olsenip takornariaqarneq, inissiat atuarfiillu ukiutoqqami oqalugiaatimini sammivai

Ukioq nutaaq aallartippoq, borgmesterillu Avaaraq Olsenip (IA) Kommuneqarfik Sermersuumi innuttaasunut ukiortaami oqalugiarnermini ukioq 2025 pingaarutilinnik pisoqarfiusoq unamminiarnartoqaqisorlu kingumut qiviarpaa.

Ukioq atuarfinnik matusiffiusoq, oqoqarfiusoq, takornariaqarnerulerfiusoq Ittoqqortoormiillu ukiunik 100-nngortorsiorluni nalliuttorsiornera - tamatumalu kingorna kommunalbestyrelsimut qinersineq. 

- Nutaanik ilaasortarpassuaqalerpoq, kommunitulli akisussaaffigut unamminiarnartullu suli taamaapput, borgmesteri januaarip aallaqqaataani oqarpoq.

Avaaraq Olsenip oqalugiarnermini suliassat arlallit eqqartorpai. Allaaserisami matumani borgmesterip oqalugiaataani suliassat aalajangersimasut kommunillu 2026-mut anguniagaasa ilaat sammissavagut. 

Sanaartornerit ilungersuanartut

Ineqarniarneq atuarfeqarnerlu Kommuneqarfik Sermersuumut akisussaaffeqarfiupput annertuut, taakkualu ukiorpassuarni 2025-milumi aamma unamminiarnartoqarput.

Nuummi inuit 2.000-ingajaat Iserit aqqutigalugu initaarniarlutik utaqqisut allattorsimaffianniipput, Tasiilamilu inuit 195-it inissarsiorlutik utaqqisut allattorsimaffianni junimi nalunaarsoqqapput.

Tasiilami ajornartorsiutit aaqqiivigiumallugit, containerit katillugit 40-t inuusuttunut inissianngortinneqartussatut ineqarnissamullu ilinniartitsinermi neqeroorutaasinnaasutut siorna sanaartorneqalerput.

- Kommuni ineqartitsiniarnerup tungaatigut suli unamminiarnartumi inissisimavoq, taamaattumik ineqartitsiniarnerup tungaatigut periarfissat kommuni tamakkerlugu qulakkkeerumallugit sulissuteqarpugut, Avaaraq Olsen ajornartorsiut pillugu ukiortaami oqalugiarnermini taama oqarpoq.

- Illoqarfimmi nunaqarfinnilu nutaanik sanaartornissamut iluarsartuussinissamullu pilersaarusiaq ukiuni qulini atuuttussaq suliarineqarpoq, taanna oqarpoq.

Aamma atuarfeqarnerup iluani sanaartukkat tungaatigut ajornartorsiutit oqoqarnermullu tunngatillugu unamminiarnartut 2025-mi sunniuteqarput.

Nuummi atuarfissuassap nutaap, Atuarfik Inussuk, aasaanerani atuanngiffeqarnerup kingorna atoqqaarfissiorneqarnissaa neriuutaagaluarluni, atoqqaarfissiorneqanngitsoorpoq.

Ukaliusap atuarfia (USK) oquk pissutigalugu septembarimi siulliulluni matuvoq.  Atuarfik Samuel Kleinschmidt (ASK) qaammat ataaseq qaangiummat matuneqarpoq, inini atuartitsiffiusuni arlalinni oqoqarnera paasineqarmat.

Atuarfiup nutaap, Atuarfik Inussuup, suli atulerneqanngitsup sanianiippoq Ukaliusaq septembarimili matoqqagallartoq. Atuartut sulisullu 600-t missaanniittut Nummi sumiiffinnut allanut inissitsiterneqarput.  Assi © : Henriette Simonsen / KNR

Tamanna pissutigalugu meeqqat atuarfigisinnaasaannik inissarsiniarneq unamminiarnartunik pilersitsivoq.

- Nalunngilara ilinniartitsisut pisortallu ukiup atuarfiusup ingerlanerani atuartitsissutigineqartut naammassineqarnissaat qulakkeerniarlugit ilungersorlutik sulissuteqartut. Atuartut anginerit misilitseqattaartussanngornerat nalunngilarput, pilersaarusiornitsinnilu tamanna pingaartinneqarnissaa neriorsuutigaara, borgmesteri oktobarimi oqarpoq. 

Avaaraq Olsenip atuarfeqarnerup tungaatigut unamminiarnartut oqalugiarnermini aamma eqqaallatsiarpai:

- Atuarfinni oquk atuartunut, ilaqutariinnut sulisunullu kingunerluuteqaqaaq. Ilinniartitsinerup pitsaanerpaamik ingerlaannarnissaa qulakkeerniarlugu iliuuseqarpugut, ilinniartitsisullu angajoqqaallu paasinninnerannut suleqataaneranullu qutsavigerusuppakka, taanna oqarpoq.

Nuummi atuarfissaq nutaaq, Atuarfik Inussuk, pillugu nalunaarutigineqartut kingulliit naapertorlugit, aggusti 2026-mi piariissaaq.

Mittarfik nutaaq, periarfissat nutaat 

Aammattaaq ukiortaami oqalugiaammi inuussutissarsiorneq erseqqissarneqarpoq. 

Kommunip inuussutissarsiornermut politikki nutaaq "aallarnisaasunut, najukkami suliffeqarfinnut kommunillu siuariartorneranut tamakkiisumik tapersersuisoq ineriartortikkusuppaa,“ Avaaraq Olsen oqarpoq.

Takornariartitsinermit inuussutissarsiorneq 2025-mi siuariartorfiulluarnera, oqalugiarnermini immikkut erseqqissarpaa.

- Nuummi mittarfik nutaaq takornarianik nutaanik siornatigullu takornariartartunit allaanerusunik amerlanerusunillu tikilluaqqusiffiusalereerpoq, tamannalu periarfissanik nutaanik pilersitsivoq, taanna oqarpoq.

Nuup mittarfissua 2024-mi novembarip 28-ani atoqqaarfissiorneqarpoq, timmisartorsuarlu Tuukkaq illoqarfik qulaallugu Københavnimit ilaasut ilaasoralugit mittarfissuarmut siullerpaajulluni mippoq. Assi © : KNR / Markus Valentin

Tusagassiorfinnit sammineqarnerulerneq mittarfillu nutaaq pissutaallutik 2025-mi angalasut amerlanerit angalanissaminnik pilersaarusiuleraangamik Kalaallit Nunaannik qimerluuerusulerput. Visit Nuuk-ip nittartagaanut isertartut marloriaammik amerlanerulersimapput.

Inuussutissarsiornermut pisortaq Mads-Daniel Skifte Kommuneqarfik Sermersooq siunissami takornariartitsinerup qanoq inuussutissarsiutigineqarnissaa pillugu innuttaasunik ataatsimiisitsinermut qaaqqusimmat, Sermitsiamut decembarimi taama oqarpoq.

Avaaraq Olsenip ukiortaami oqalugiarnermini innuttaasunik ataatsimiititsinermi oqariartuutigineqartoq uteqqippaa – tassaasoq takornariartitsisarnerup ineriartortinneqarnera "innuttaasut pisariaqartitaat aallaavigalugit“ pissasoq. Tamatumalu saniatigut pinngortitap pisuussutillu paarineqarnissaat pingaaruteqartoq, taassumap erseqqissaatigaa.

- Taamaattumik sumiiffinni takornariarfiusinnaasut killilersorniarlugit aalajangerpugut, takornariaqarneq pinngortitaq inuiaqatigiillu artukkernagit akisussaassuseqartumik ineriartortitsinneqarniassammat. Sumiffiit taakkua erseqqissumik nalunaarsorneqassapput, borgmesteri oqalugiarnermini oqarpoq. 

- Aqqut siunnerfipput aputitut nutaatut ippoq 

Soorlu Avaaraq Olsen 2026-mut missingersuutit siorna decembarip pingajuanni isumaqatigiissutigineqarneranni oqartoq, ineriartorneq Nuummi taamaallaat malugineqassaaq.

Akisussaaffeqarfiit siammarterneqarnissaat kommunillu illoqarfinnik nunaqarfinnillu nukittunerulersitsinissaa ukiumi nutaami pingaartinneqassasut, oqalugiaammi oqaatigineqarpoq. 

- Anguniagarput unaavoq, innuttaasut tamarmik - kommunip iluani sumi najugaqarnerat apeqqutaatinnagu - pitsaasumik ataqatigiissaartumillu kiffartuunneqarneq misigissagaat.

Ukioq manna aningaasanut inatsisissami nutaami Ittoqqortoormiini piniartutut inuussutissarsiortuunerup siuarsarnissaa, Tasiilami innuttaasunik sullissinerup patajaannerulersinnisaa Paamiunilu Qeqertarsuatsiaanilu atuarfiit pitsanngorsarnissaat suliniutiginiarneqarput.

Aalajangiinerit amerlanerusut najukkami aalajangiiffigineqartarnissaat qulakkeerniarlugu Ittoqqortoormiini najukkami aqutsisoqarnerulissasoq missingersuutit isumaqatiginninniutigineqarnerisa kingorna saqqummiunneqarpoq.

- Ukiup nutaap aallartinnerani aqqut siunnerfipput aputitut nutaatut ippoq, borgmesteri oqalugiarnermini oqarpoq.

- Naleqartitagut pingaartitagullu aqqutissiuisuupput. Taamaattumik uagut - innuttaasutut, qinikkatut kommunitullu - aqqut atorniagarput nammineq ilusilersussavarput.

- Ukioq nutaaq 2026 periarfissanik, aalajangigassanik aqqutissanillu nutaanik ulikkaarluni siunitsinniippoq. Ataatsimoorluta - tapersersoqatigiilluta akisussaaffeqaqatigiittut inuppalaassuseq pingaarnerpaatillugu - ukioq nutaaq iserfigitigu, taanna naggasiivoq.