Containerit ineqarfiusinnaasut 40-t Tasiilamut tikiunneqarput

Tasiilami inissaaleqinermi ilungersunartorsiornermi containerit ineqarfiusinnaasut iluaqutaassapput. Containerit ineqarfiusinnaasut arfineq-pingasut iserterfigineqarsinnaaliivinnissaat naatsorsuutaavoq, taakkualu nammineq najugaqalernissamut sungiusarfittut atorneqassapput, kommuni allappoq.

Allattoq Birgitte Kjeldsen

novembarip 10-at 2025 11:51

Nutserisoq Karla Heilmann

- Innuttaasut namminneq initaarnissaannut tapersersuinerup aamma ulluinnarni akisussaassuseqarluni inuunissaannut ikiuunnerup iluaqutaanerata takunissaanut qilanaarpugut.

Containerit ineqarfiusinnaasut arfineq-pingasut Tasiilami piareersarneqartut pillugit Isumaginninnermut Inunnullu Innarluutilinnut Ataatsimiititaliami siulittaasoq Justus Hansen taama oqarpoq.

Containerit 40-t ineqarfissanngorlugit allanngortitikkat Nuummiit Tasiilamut tikiunneqartuni arfineq-pingasut nammineq najugaqalernissamut sungiusarfiussapput.

Aamma atuarukTasiilami inissianik utaqqineq sivisuvoq

- Innuttaasut namminneq initaartigatik tapersersorneqarnissamik pisariaqartitsisut, sungiusaatigalugu containerini piffissami sivikitsumi ineqarsinnaassapput, Kommuneqarfik Sermersooq tusagassiorfinnut nalunaarummi allappoq.

Containerimi ineqarfiusinnaasumi ataatsimi innuttaasoq ataaseq inissaqarpoq. Aappariinnullu aamma inissaqartitsisoqaratarsinnaasoq, kommuni allapppoq. Tamatuma saniatigut innuttaasunut namminneq inuuniarnermikkut ingerlariaqqinnissaannut initaarnissaminnullu sungiusartunut ikiortaasussanik sulisoqartitsissaaq.

Containerit arfineq-pingasut uani qaammammi imaluunniit decembarimi iserterfigineqarsinnaanngornissaat naatsorsuutaavoq.

Utaqqiisaagallartumik ineqarfiit 32-t

Containerit nammineq najugaqalernissamut sungiusarfittut atugassat arfineq-pingasut saniatigut 32-t inuusuttut najugaqarfissaannik sanaartortoqarnissaata tungaanut utaqqiisaagallartumik inuusuttunut inissiatut atorneqassapput.

Tasiilami pisortat inissiaataannik aqutsisoq Iserit illoqarfimmi inissianik attartortakkanik 14-inik sanaartuleruttorpoq.

Tasiilami inuit initaarnissaminnut utaqqisut juunimi 195-iusut, Iserip kisitsisaataasa takutippaat.

Tasiilami Bychefi Hjørdis Viberg containerit ineqarfiuagallarsinnaasut pillugit oqaaseqarpoq:

- Containerinik inigineqarsinnaasunik peqalernikkut innuttaasut inissaqanngitsut ikiulertornissaannut periarfissaqalerpugut. Aaqqiissutaaginnarallarpoq, illoqarfimmili kikkut tamarmik angerlarsimaffeqarnissaannut pingaaruteqarluni, tusagassiorfinnut nalunaarummi oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.