Casper Frank Møller Danmarkimi kandidatinngorniarluni naammassigami, ikinngutigilluakkani marluk peqatigalugit suliffeqarfimmik Raw Arcticimik pilersitsiniarluni, Nuummut siorna uterpoq.

Umiarsuillu takornariartaassuit nunatsinnut tulakkaangata, niueqatigiinniarnermi sullissiniat nunanit tamalaaneersut, umiatsiarsorlutik angallassisartunik nunaqavissunik imminnut unammisitsiniaalertarnerat sivitsunngitsoq misigisaqarfigaa.

- Sullissisut nunanit tamalaaneersut umiarsuillu takornariartaatit aningaasarsiornerpaasarput, uagullu taakku pisiaannik tunniussisuusugut annikinnerpaamik isertitsisarluta. Isumaqarpungalu tamanna Kalaallit Nunaanni akuerineqarlunilu akuerinnissutigineqarsimanera isumassaqanngitsoq - ingammik takornariaqarnermik ineriartortitsinissap piorsarneqarnissaa aamma anguniarneqartillugu. 

Taamaattumik Erik Palo Jacobsen peqatigalugu Nuuk Cruise Agency pilersippaa.

Umiatsiarsorlutik angallassisartut ataatsimoortilerniarlugit, ingerlatseqatigiiffiit arfineq-marluusut kattullutik Nuuk Cruise Agency pilersissimavaat, Casper Frank Møller pisortaanertut inissillugu.
Isumassarsiaq paasiuminarpoq: Umiarsuit takornariartaatit umiatsiarsorlutik angallassisartut ataasiakkaat isumaqatiginninniarfigisinnaajunnaarlugit ingerlatseqatigiiffik taamaallaat isumaqatiginninniarfigisinnaalerpassuk, pissaanermi oqimaaqatigiinnginneq mumisinneqassaaq.

- Nalinginnaasumik ima ingerlasoqarpoq. Umiarsuaq takornariartaat Nuummut tulakkaangat, niueqatigiinnermi isumaqatiginninniartartup nunaqavissut umiatsiarsorlutik angallassisartut assigiinngitsut attaveqaqattaarfigisarpai aperalugillu inuk ataaseq, assersuutigalugu 600 kronenik akiliisillugu ilaasorisinnaaneraat.

- Akiliutiginiagaat annikigigaanni, isumaqatiginninniartartoq angallassisartut allat aperiinnassavai. Umiatsiarsorliutik angallassisartut, umiarsuarni takornariartaatiniit isumaqatiginninniartartunit taamatut imminnut unammisinneqalertarput, akilu appasinnerpaaffissaaniitinneqalertarpoq, Casper Frank Møller nassuiaavoq.

Ingerlatseqatigiiffik ataatsimoorussaq nunaqavissunut atugarissaartitsinerulissaaq

Periuseq nutaaq atorlugu takornarianit tusindilikkuutaanit ukiut tamaasa nunatsinnut tikeraartunit isertitat amerlanerusut nunamiiginnarnissaat qulakkeerneqarnissaa, Nuuk Cruise Agencyp neriuutigaa.

Ilaatigut umiarsuit takornariartaatit umiatsiarsorlutillu angallassisut akornanni toqqaannartumik attaveqalersitsinikkut, akunnermiliuttunik niuertoqartarunnaarsitsinikkut, taakkummata iluanaarutit ilarujussuanik amerlanertigut pissarsisartut.

- Umiarsuaq takornariartaat tikikkaangat ilaasoq 2.000 koruunit 2.500 koruunillu akornanni umiarsuarmi akiliisarpoq, isumaqatiginninniartartorlu 2.000 koruunit 1.500 koruunillu akornanni akissarsisarluni. Taava umiatsiarsorluni angallassisartoq ilaasumut ataatsimut 500 koruunit 600 koruuninillu akornanni isertitaqassaaq.

- Tassa imaappoq umiarsuit takornariartaatit, angalanernik tuniniaasartut isumaqatiginninniartartullu aningaasanik annerpaamik isertitaqartartuupput, uffa umiatsiarsorlutik angallassisartut navianartorsiorsinnaanertik akueralugu angallassinissamik suliaqartuusut, Casper Frank Møller oqarpoq.

Casper Frank Møller Raw Arcticimik siorna aallarneeqataagami, suliffeqarfissuit nunaqavissut takornarialerisut minnerit imminnut qanoq unamminerulersitsigineraat paasilertupallappaa. Assi © : Privatfoto

Ilulissani assingusumik suliniuteqartoqarpoq, tassani takornarialerisut Ilulissat Excursions-imi kattupput.

Ingerlatseqatigiiffilli arlaleriarluni eqqartugaasimavoq, ilaatigut Avannaata Kommuniani borgmesterip Lars Erik Gabrielsenip piginneqataasimanera pissutigalugu.

Taamaattumik soqutigisat assigiinngitsut akerleriissutaalernissaat pinngitsoortinniarlugu, Nuuk Cruise Agency umiarsuarnik takornariartaatineersunik takornariartitsineq kisiat sammissallugu aalajangerpoq, umiatsiarsorlutillu angallassisartut tamarmik ingerlatseqatigiiffimmi naligiimmik piginneqataalersillugit.

- Anguniagaq takorluugarlu assigiipput: Kalaallit takornarialerisut qanoq aningaasatigut siuariartortissinnaanissaat. Umiarsuarnilli takornariartaatineersunik taamaallaat angallassinissaq ingerlatsivitsinni allaanerussutigaarput, Casper Frank Møller nassuiaavoq.

- Ilulissat Excursions-imi pisimasunik ilinniarfigisimasagut pissutigalugit taamaaliorsimavugut, takornarialerinerup iluani inuttut qanimut nalunngisanik suliffeqarfissuarnilluunniit suleqateqarluni takornarialerineq akimorlugu suleqatiginninniartarneq, taamaaliortoqarneranilu inunnik ataasiakkaanik mattussisarnerit, taakkunani pisarsimammata.

Aammali imaanngilaq Nuuk Cruise Agency tamanut ammasoq.

Casper Frank Møller naapertorlugu pitsaassutsimik qulakkeerinninnissaq tunngaviuvoq -  nunaqavissunut takornariartitsisartut nunatsinnullu takornariatartartut eqqarsaatigalugit.

- Annertussuseq pinnagu pitsaassuseq isiginiarnerorusupparput. Tamanna takornarianut tunngatillugu aamma atuuppoq. Takornariat amerlassusaat eqqoqqissaartariaqarput illoqarfiit inunnik tassanngaannaq ulikkaannginniassammata. Aamma takornariat nunatsinni aningaasanik atuisut amerlanerusariaqarput, oqarpoq umiarsuarlu Viking maligassiuilluarnerarlugu.

- Vikingimik taaguutilik, umiarsuaanngilaq 4.000-inik ilaasoqarsinnaasoq, 276-illi aamma 512-it akornanni ilaasoqarsinnaavoq, umiarsuillu takornariartaatit tikerarneranni tikittarpoq. Taamaakkaluartoq aningaasanik amerlanerungaartunik nunatsinni atuisarput. Takornariartaatit tikerartartut taamaattut amerlanerulernissaat neriutigaara.

Umiarsuarmi mikineruvoq 276-illi 512-illu akornanni ilaasoqarsinnaalluni, takornariartaassuarniilli takornarianik tuusintillit arlaqartunik ilaasoqarsinnaasuninngarnit, illoqarfimmut nunaqavissullu inuussutissarsiornerinut isertitsissutaangaatsiarnermik tapersiisuulluni.

Takornariaqarneq allanngornerup nalaaniippoq 

Casper Frank Møller siunissamut isumalluarpoq.

Takornariartitsinermut inatsisit nutaat sunniutaat malugilereerpai, malittarisassallu suli amerlanerusut atuutilernissaat neriuutigaa.

Taamaattorli siunissamut arlalinnik isumakuluutissaqarpoq.

Nunatsinni takornariaqarneq allanngoriartorpoq, tamanullu naleqqussarnissaa ajornaatsuinnaanngilaq.

- Takornariaqarnermut tunngatillugu nunatsinni ineriartornermut isumaliutersuummik allanngortitsinaveersaartuuvugut, avatangiisitsinnut atalluinnartugatta, taanna oqarpoq.

- Ima assersuusiorsinnaavunga, takornarianik angallassinermi sumiiffinnut nutaanut pulajartoraanni, inuit ilaat ataqqineqanngiivittutut misigisarput.

Takornariartitsinerli aningaasaqarnikkut namminiilivinnermut aqqutissiueqataassappat, ineriartornermi periarfissat ammaffiginerunissaat pisariaqarpoq, taanna taama isumaqarpoq.

- Aatsitassarsiorfiit pilersinneqarnissaat oqaluuserineqartaqaaq. Tamannali pinngortitamut sunniuteqarnerpaassaaq. Aningaasarsiorfissatullu salliutinneqassappat ajorluinnassaaq.

Kalaallit Nunaatali takornariaqarneq siuarsartariaqarpaa – kalaallilli atugassarititaat tunaartaralugit.

- Takornariaqarnermi suna ilisarnaatigaarput? Nunatta tulluusimaarluta takutinnissaa. Nunatsinnillu nittarsaassillaqqinnerpaat kikkuuppat? Tassa uagut nunaqavissut, Casper Frank Møller oqarpoq.