Qulaarpaa Meeqqat tatigisaminnit atornerlunneqartarput

Inuiaqatigiinni assigiinngitsunik atugalinni tamani kinguaassiuutitigut atornerluisoqartarpoq. Taamaattorli Nunatsinni kannguttaatsuliortartut amerlanersaat assigiissuteqarput. Atornerluinerni tamangajanni kannguttaatsuliortup meeraq innimiilliorfigisani ilisarisimasarpaa.
Assi © : Paalu Møller/KNR
Allattoq Walter Turnowsky
maajip 07-at 2015 07:09
Nutserisoq Elisa Isaksen

Kinguaassiuutitigut innarliisarnerit inuiaqatigiinni innuttaasunut aalajangersimasunik atugalinnut taamaallaat tunngassuteqanngilaq. Tamannami atugarissaartuni atugarliortunilu assigiimmik nassaassaavoq.

Kannguttaatsuliortoq kalaaliusinnaavoq qallunnaajusinnaalluniluunniit. Tamanna eqqartuussissuserisup Ulrik Blidorfip maluginiarpaa. Taanna inuppaalussuarnut kinguaassiuutimikkut atornerlunneqarsimasunut illersuisuusarsimavoq.

Taama pisoqartarnera politiinit uppernarsarneqarpoq. Taamaattorli taakku assigiissuteqarnerat Taatsi Fleischerip Nuuk Politiineersup maluginiarsimavaa.

 

Meeqqamik ilisarisimasaminnik atornerluisartut

- Atornerluisoq tamatigungajak meeqqap ilisarisimasarpaa. Taanna angajoqqaat ilisarisimasarisinnaavaat ungasinnerusukkulluunniit ilaqutarisinnaallugu, Taatsi Fleischer oqarpoq, imaluunniit allatut oqaatigalugu tassaasarluni meeqqap tatigisaa.

Politeeq eqqartuussissuserisorlu allamik aamma maluginiagaqarsimapput. Tassami innarliisoq meeraagallarami atornerlugaasimagajuttarpoq.

Ingammik kannguttaatsuliortoq arlaleriarluni innarliisimatillugu tamanna naammattuugassaasartoq, Taatsi Fleischerip oqaatigaa.

Matumanilu Kalaallit Nunaat nunat allanut naleqqiullugu allaanermik inissisimavoq. Nunanimi allani meeqqanik ilisarisimanngisanik atornerluisarneq takussaaneruvoq.

SFI-p nalunaarusiamini sapaatit-akunneri marluk matuma siorna saqqummersitamini tamanna aamma immikkut maluginiarpaa.

- Meeqqap tatigisarisarpaa, eqqartuussissuserisoq Ulrik Blidorf erseqqissaavoq.

Ataataasulli anaanaasullu atornerluisarnerat nalinginnaavallaanngilaq.

 

Kannguttaatsuliorfigineqartoq kannguttaatsuliortunngoraangat

Inuk takuinnarlugu ukiukitsunik atornerluisartuunersoq takuneqarsinnaanngikkaluartoq, amerlanersaat atugarisimasamikkut assigiissuteqarput.

- Eqqartuussisoqartillugu saqummiunneqakkajuttarpoq atornerluisoq meeraanermini aamma atornerlunneqarsimanera, Ulrik Blidorf oqarpoq.

Tamannalu Kalaallit Nunaanniinnaq atuutinngilaq. Nunani allani aamma tamanna atuuppoq, meeraanerup nalaani atornerlunneqarsimagaanni inersimasunngornermi nammineq atornerluisunngornissamut qaninnerusoqalersarluni.

Taatsi Flesicherip politiineersup meeqqap arlaleriarluni kannguttaatsuliorfigineqarsimaneranik suliat immikkut maluginiagaqarfigisimavai. Atornerlunneqarsimasoq misigisimasani suliarinngippagit nammineq atornerluisunngorsinnaanera qaninnerulersarpoq.

- Taamaammanuna kinguaassiutimikkut atornerlunneqarsimanermikkut kingunerlutsitsisut katsorsarneqarnissaat ilaatigut pingaaruteqartoq. Taamaaliornikkummi atornerluisoqaqqinnginnissaa anguneqarsinnaammat, tarnip pissusianik ilisimasalik Naja Lyberth oqarpoq. Taanna kingunerlutsitsisimasunik katsorsaalluni angalasartunut ilaavoq.

Sulianut ilaakkajuttut aamma ilagaat atornerluisoqartillugu imigassartorsimatilluni tamatuma pisarnera.