Atornerluisunik katsorsaavik akiliisinnaajunnaartoq
Frederiksberg Centeret Danmarkimiittoq atornerluinernik assigiinngitsunik, soorlu imigassamik atornerluinermik aningaasanoorajunnermillu katsorsaanermik ukiut 25-t sinnerlugit neqerooruteqarpoq.
Namminersornerullutik Oqartussat - kingornalu Namminersorlutik Oqartussat - Frederiksberg Centret Nuummi Ilulissalu ukiuni arlalinni suleqatigaa, soorlu aamma Pinerluttunik Isumaginnittoqarfiup katsorsaavik suleqatigisimagaa.
AAMMA ATUARUK Aalakoornartutalimmik imigassartortarnerit tamarmik ajoqutaapput
Tamaangali killeqarpoq. Sapaatit akunneratami siuliani aggustip 21-ani, Frederiksberg Centerimi aqutsisoqatigiit akiliisinnaajunnaartutut nalunaarumallutik qinnuteqarput, akiliisinnaajunnaarnermi pigisanik isumaginnittussatut toqqarneqartoq SJ Laweimeersoq Bo Lauritzen taama ilisimatitsivoq.
Frederiksberg Centerip akiliisinnaajunnaartutut nalunaarutigeqarnera maanna suliarineqarpoq. Katsorsartittullu arlallit katsorneqarnerisa ingerlatiinnarnissaata qulakkeernissaa sapaatit akunnerata siuliani pingaarnertut isumaginiarneqartoq Bo Lauritzenip KNR-imut oqaatigaa.
Kalaallinik katsorsaaneq ingerlaannassaaq
Frederiksberg Centerillu neqeroorutaasa ilaat allanit isumagineqarnissaat iluatsinneqarpoq.
Hashimik imigassamillu atornerluinermik katsorsaaneq oqaatsivut atorlugit ingerlanneqartartoq kiisalu atornerluisunik katsorsaasutut ilinniartitaaneq, DAC-mik taaneqartartoq, Frank Hansenip, Erik Hansenip Anne Sofie Broe Hansenillu sapaatit akunnerata siuliani ingerlatarilerpaat.
AAMMA ATUARUK Allorfiup innersuussisoqarnerunera nuannaarutigigaa
- Ingerlatarilikkavut marluusut iluatsissinnaassallugit upperaarput, isumaginninnermi siunnersorti imigassamillu atornerluisunik katsorsaasoq Frank Hansen KNR-imut oqarpoq.
Frederiksberg Centeret, ilaatigut oqaatsivut atorlugit atornerluisunik katsorsaanermik Københavnimi neqerooruteqartoq akiliisinnaajunnaarpoq. Kalaallinilli atornerluisunik Danmarkimi katsorsaaneq piginnittunit nutaanit ingerlatiinnarneqassaaq.
Frederiksberg Centerimi oqaatsivut atorlugit atornerluisunik katsorsaanermi suliniutinik aqutsisup Maria Tausenip suleqatiginera piginnittut ingerlatiinnarpaat.
Oqaatsivut atorlugit katsorsartittut maanna arfineq-marluupput, katsorsartereernermilu ikorfartorneqartut marluullutik.
AAMMA ATUARUK Naalakkersuisut vil have behandlingscentre i alle kommuner
Piginnittunngortut katsorsaanermut DAC-nngorniarnermullu Københavnimi Esplanadenimi maannamut inissisimasimasumut ininik nutaanik maanna pissarsiuleruttorput.
Akiliisinnaajunnaarnermilu pigisanik isumaginnittoq Bo Lauritzen naapertorlugu, Frederiksberg Centerip ataani neqeroorutinut allanut marlunnut isumaginnittussarsiortoqaleruttorpoq, tassalu aningaasanoorajuttunik nerisarnermillu ajornartorsiuteqartunik katsorsaanerit.
Gizur Helgason aamma Morten Dalsgaard ingerlatseqatigiiffimmik akiliisinnaajunnaartumik piginnittuupput. Morten Dalsgaardili februaarimi toquvoq, KNR-illu paasisai naapertorlugit imminut akilersinnaasumik tamatuma kingorna ingerlatsisoqarsinnaasimanngilaq.
