Ukiuni 14-ini kinguariartortoq: Atassummi arfininngorpamit siulittaasunngorniartoq ataasiinnaasoq
Atassut sapaatip akunnerata naanerani ataatsimeersuartitsissaaq, siulittaasumillu nutaamik toqqaasoqassalluni.
Atassutip maanna siulittaasorisaata, Siverth K. Heilmannip Aqqalu Jerimiassen siulittaasussatut innersuunniarpaa.
- Piukkunnarnerpaatut isigigakku suliallu kivilluarsinnaassagaa qularutiginngilluinnarpara, Siverth K. Heilmann tusagassiuutinut nalunaarummi allappoq.
AAMMA ATUARUK Oprør i Atassut efter valgnederlag
Heilmannip oqarnera naapertorlugu ataatsimeersuartoqannginnerani siulittaasussatut ammamik sassartoqanngilaq.
Atassutip siulittaasortaassaa siuliassaqangaatsiassaaq, tassami partiip nuannarineqassusaa ukiuni qulikkuutaani appariartuinnarpoq.
Ukiuni 14-ini ammuinnaq ingerlasoq
Atassut 2005-imi Inatsisartunut qinersinermi qinersisut 5 procentiinik taaguunneqarpoq, Inatsisartunulli siorna qinersinermi partii qinersisut 20 procentingajaannik taaguunneqarluni.
Siverth K. Heilmann Atassummi siulittaasutut 2017-imi februaarimi toqqarneqarpoq. Partiillu katersuunnissaa qinersisartullu uterteqqinnissaat suliassarisimallugu nammineq oqaatigaa.
Qinersinernili kingullerni pingasuni tassa kommuninut, inatsisartunut folketingimullu qinersinerni tamanna iluatsissimanngilaa, Atassullu kinguaraluttuinnarluni. Kingullermik folketingimut qinersisoqarmat partii 2,1 procentpointinik kinguariaateqarpoq.
Qinersinermi ajorsarnerup kingorna siulittaasoq isornartorsiorneqartoq
Tamanna pissutigalugu partiimi siulittaasup tulliata, Qulutannguaq Berthelsenip folketingimullu qineqqusaartup Bentiaraq Ottosenip siulittaasoq, Siverth K. Heilmann isornartorsiorpaat.
Qinersisoqareerneranili tunuarniannginnerarpoq, taamaakkaluartorli partiip ataatsimeersuarnissaanut siulittaasumik nutaamik toqqaasoqassasoq aggustimi nalunaarutigaa.
AAMMA ATUARUK Siverth Heilmann trækker sig som formand for Atassut
Siverth K. Heilmannip Atassummi siulittaasuunerani partii aalassassimaarfiuvoq. Partiip Inatsisartunut ilaasortaat marluk tassa Knud Kristiansen aamma Mala Høy Kukop parteertik qimallugu Siumumut nuupput.
Tamanna pissutigalugu partii inatsisartunut siorna qinersinissamut atsiortitsinernik katersisariaqarsimavoq.
Atassut ukiumi ataatsimi Naalakkersuisuniittoq
Atassut qinersinerup kinguneratigut naalakkersuisooqatigiinni ilaalerpoq, Siverth K. Heilmannilu avatangiisinut, pinngortitamut ilisimatusarnermullu naalakkersuisunngorluni.
Ukiorli ataaseq qaangiutinngitsoq, ukioq manna apriilip qaammataani Atassutip Kim Kielsenip naalakkersuisuutitai qimaqqippai. Tamatumalu pinngilaarnerani partiimit Naalakkersuisunut ilaasortap aappaata Atassummilu siulittaasunngussagunartup, Aqqalu Jerimiassenip nunarsuup kissatsikkiartornera inunnit pilersitaanera upperinagu oqaaseqarneratigut akerleriittoqalerpoq.
Siverth K. Heilmann siulittaasuunermi nalaani aamma napparsimalerpoq, iluaallernermilu kinguneratigut qaammatini sisamani sulinngiffeqarluni.
