Atassut naalakkersuisoqatigiinnit tunuarpoq, Jeremiassenilu naalakkersuisutut aamma tunuarluni
Naalakkersuisut siulittaasuata Kim Kielsenip Inatsisartuni tamanna nalunaarutigeqqammerpaa.
Taamaalilluni Inuussutissarsiornermut Nukissiuuteqarnermullu naalakkersuisoq Aqqalu Jeremiassen (A) aamma Siverth K. Heilmann (A) aamma tunuarput.
Inuussutissarsiornermut naalakkersuisoqarfik ineqarnermut attaveqatigiinnermullu naalakkersuisup Karl Frederik Danielsenip (S) akisussaaffigigallassavaa.
AAMMA ATUARUK IA aamma D: Aalisarnermut naalakkersuisoq tatiginngilarput
Kielsenip avatangiisinut ilisimatusarnermullu naalakkersuisoqarfiit akisussaaffigilissavai.
Nikkulaat Jeremiassenip aalisarnermut, piniarnermut nunalerinermullu naalakkersuisutut akisussaaffigisai Aatsitassanut suliffeqarnermullu naalakkersuisup Erik Jensenip isumagigallassavai.
Atassut Inatsisartuni marluinnarnik ilaasortaqarpoq, partiilu naalakkersuisoqatigiinnit tunuaraluartoq Kim Kielsenip naalakkersuisoqatigiivi suli amerlanerussuteqartunit tapersersorneqarput.
Piffissami kingullermi aalassassimaarutigineqartut
Naalakkersuisunut ilaasortat marluk piffissami kingullermi assoralisimaangaatsiarput.
Nikkulaat Jeremiassen qaleralinnik aalisapiluttoqarnera pillugu tusagassiorfinnut qinikkanullu assigiinngitsunik nassuiaateqarsimasutut isornartorsiorneqarpoq. Inatsisartut aalisarnermut ataatsimiititaliaata taama nassuiaateqarsimanera isoralugu naalakkersuisoq tatigiunnaarlugu sapaatit akunnerata siuliani nalunaarutigaa.
AAMMA ATUARUK Demokraatit: Nikkulaat Jeremiassen Aqqalu Jerimiassenilu sukkanerpaamik tunuartariaqarput
Aamma Inuit Ataqatigiit, Demokraatit Partii Nalerarlu naalakkersuisoq tatigiunnaarlugu nalunaaruteqarput.
Aqqalu Jerimiassen nunarsuup silaannaata kissakkiartornerata inunnit pilersitaanera upperinagu Sermitsiaq.AG-mut sapaatit akunnerata siuliani oqaaseqarnini pillugu isornartorsiorneqangaatsiarpoq.
Tamannalu pillugu Demokraatit, Inuit Ataqatigiit Partii Nalerarlu naalakkersuisumut tatiginnikkunnaarlutik aamma nalunaaruteqarput.
