IA aamma D: Aalisarnermut naalakkersuisoq tatiginngilarput

Inuit Ataqatigiit politikkikkut oqaaseqartartuata Aqqaluaq B. Egedep partiip aalisarnermut naalakkersuisumut tatiginninnginnertik ima tunngavilersorpaa.
- Naalakkersuisoq eqqortumik nalunaaruteqartartussaavoq, aammalu ataatsimiititaliap inatsisartullu sulinerannut innimiilliortussaatitaanngilaq, eqqortunillu paasissutissanik aalajangernissatsinnut tunngavissatsinnik tunineqartussaavugut, tamannalu malillugu naalakkersuisoq sulinngilaq, Aqqaluaq B. Egede oqarpoq.

Naalakkersuisoqatigiinnut ikorfartortaasut Demokraatit Aalisarnermut, Piniarnermut Nunalerinermullu Naalakkersuisumut Nikkulaat Jeremiassenimut tatiginnikkunnaarput.

- Tatiginngilarput, siunissaq ungasinnerusoq isigalugu Nikkulaap inissisimanissaa tassaniussasoq, Demokraatit siulittaasuata tullia Randi Vestergaard Evaldsen KNR-imut oqarpoq.

Maannakkut inissisimaneq imaalerpoq, inatsisartunut ilaasortat 14-nit aalisarnermut naalakkersuisumut tatiginninngittut paasinarsilluni.

Naalakkersuisoqatigiinni partii anginerpaap Siumup Naalakkersuisut siulittaasuata Kim Kielsenip isummernissaa utaqqimaaraat partiip gruppemi siulittaasua KNR-imut oqarpoq.

- Naalakkersuisut siulittaasuata naalakkersuisuutitaminut qanoq inerniliinera tusassallugu utaqqivarput, Karl Kristian Kruse oqarpoq.

Kim Kielsenip naalakkersuisoqarfianiit nalunaarput ataatsimiinnerit suli ingerlammata siulittaasoq ullumikkut oqaaseqarusunngitsoq. Suleqatigiissitsisut, Partii Naleraq Atassullu attavigereeraluarpagut maannamulli suli uterfigineqanngilavut.

Nunatta Qitornaasa Naalakkersuisut siulittaasuata isummernera malinniarpaa.