Demokraatit: Nikkulaat Jeremiassen Aqqalu Jerimiassenilu sukkanerpaamik tunuartariaqarput

Nikkulaat Jeremiassen (S) Aqqalu Jerimiassenilu (A) Naalakkersuisunit sukkanerpaamik tunuartariaqarput. Namminnerlu tunuanngippata Naalakkersuisut siulittaasuata tunuartittariaqarpai. Demokraatit Naalakkersuisunut ikorfartuisuusut taama piumasaqarlutik nalunaaruteqarput.
Demokraatiniit inuit taasagut Naalakkersuisuunissaminnut piukkunnanngitsutut isigaagut. Nunarput pineqarpoq, uppernassuserput siunissarpullu - taakkulu innarlerneqassapput pineqartut ingerlaqqiinnassagaluarpata, Randi Vestergaard Evaldsen allappoq
Allattoq Christine Hyldal
apriilip 08-at 2019 10:15
Nutserisoq Ivik Kristiansen

Demokraatimmi Naalakkersuisunut ilaasortat taakku marluk tatigiunnaarpaat, Demokraatit siulittaasuata tullia Randi Vestergaard Evaldsen tusagassiuutinut nalunaaruteqarluni allappoq.

Demokraatiniit inuit taasagut Naalakkersuisuunissaminnut piukkunnanngitsutut isigaagut. Nunarput pineqarpoq, uppernassuserput siunissarpullu - taakkulu innarlerneqassapput pineqartut ingerlaqqiinnassagaluarpata, Randi Vestergaard Evaldsen allappoq.

Aalisarnermut, piniarnermut  nunalerinermullu naalakkersuisoq, Nikkulaat Jeremiassen, aalisapiluttoqarneranik illuatungaatigullu nungusaataanngitsumik aalisartoqarnerarlugu imminnut assortuuttunik saqqummiussisarsimasutut Inatsisartut aalisarnermut ataatsimiititaliaannut ilaasortanit tallimanngormat isornartorsiorneqarpoq.

AAMMA ATUARUK Nikkulaat Jeremiassen aalajangiinissaamut utaqqivoq

Aalisarnermut ataatsimiititaliamut ilaasortarput Steen Lynge oqarpat Aalisanermut Naalakkersuisoq tatigiunnaarlugu, isumaqarpoq parteerput sinnerlugu oqaaseqaataasoq, Randi Vestergaard Evaldsen allappoq.

Inatsisartunut ilaasortat innuttaasullu piumasaraat Naalakkersuisoq kinaluunniit eqqortumik oqaluttassasoq. Takinerusariaqanngilaq taamaattussaavorlu.

"Nunarsuarmioqatitsinnit isiginerlunneqaleratarsinnaavugut"

Aqqalu Jerimiassenilu silap pissusiata allanngoriartornera inunnit piliaasorinagu Sermitsiaq.AG-mut sapaatit akunnerisa siuliani oqarmat ilaatigut Inuit Ataqatigiinnit, Partii Naleqqamit Demokraatiniillu sakkortuumik isornartorsiorneqarpoq. Tassalu Demokraatit maanna tunuaqqusipput.

AAMMA ATUARUK Aqqalu Jerimiassen isornartorsiorneqartuarsinnartoq

Demokraatiniit oqaasii sakkortunerpaamik akerlilerpagut, oqarmat silap pissusaata allanngoriartornera inuup pilersitarinngikkaa. Oqaaseqarnera inuttut isummamik aallaaveqarneruvoq ilisimatuussutsikkullu paasisanut uppernarsaatissalinnut assortuilluni taamaattumik nunarsuarmioqatitsinnit isiginerlunneqalerataannaavugut, Randi Vestergaard Evaldsen allappoq.

Naalakkersuisunut ilaasortat taakku marluk Demokraatinit tapersersorneqarunnaaramik naalakkersuisutut navianartorsiorput.  Amerlanerussuteqartunit akerlilerneqassanngikkunik partiinit illuatungiliuttunit Inuit Ataqatigiinnit Partii Naleqqamiilluunniit tapersersorneqartariaqassapput.

Nunatta Qitornaasa siulittaasuata Vittus Qujaukitsup Nikkulaat Jeremiassenimut tunngasut tusagassiutitiguinnaq tusartaramigit tatiginnisssanerluni tatiginnikkunaassanerluniluunnit suli aalajanginngilaq.

Taassuma naaalakkersuisoqatigiinni partiit annersaata Siumup Naalakkersuisullu siulittaasuat, Kim Kielsen kaamaattorpaa suliamut tunngatillugu nalorninartorsiorneq qaangerniaqqullugu.