Nikkulaat Jeremiassen aalajangiinissaamut utaqqivoq

Aalisarnermut ataatsimiititaliamit tatigineqarunnaarnini ersarilluaraluartoq,  Nikkulaat Jeremiassen tunuarnialersaanngilaq. Naalakkersuisoqatigiinnermut isumaqatigiissut malillugu suligama, ilerasuuteqanngilanga, taanna KNR-imut oqarpoq.
Aalisarnermut naalakkersuisoq maanna pissanganartorsiorfimmiippoq. Naalakkersuisuuginnassanerluni maanna paasitserpaa.
Allattoq Jens Thorin
apriilip 06-at 2019 14:16

Aalisarnermut ataatsimiititaliami sapaatit akunneranni ataatsimi eqqissiviilliorfioreertoq, ataatsimiititaliaq ataatsimoortoq tallimanngornermi inerniliivoq.

Aalisarnermut, piniarnermut nunalerinermullu naalakkersuisoq ataatsimiititaliamit tatigineeruttoq, ataatsimiititaliaq tusagassiuutinut allappoq.

AAMMA ATUARUK Udvalg udtrykker mistillid til Nikkulaat Jerimiassen

Tamanna ilaatigut Ataatsimiititaliap paasinninnera napertorlugu Naalakkersuisup qaleralinniarfiit ilaanni aalisapiluttoqarneranik illuatungaatigullu nungusaataanngitsumik aalisartoqarnerarlugu imminnut assortuuttunik saqqummiussisarneranik tunngaveqarpoq.

Nikkulaat Jeremiassen ataatsimiititaliamut nassuiaammik nassiussinikuuvoq.

Ataatsimiititaliarli ataatsimoortoq tamatuminnga saamanerulinngilaq:

 - Ataatsimiititaliap aalajangernera imaappoq, taakku qularnaarsinngikkaat, siulittaasoq Henrik Fleischer (S) KNR-imut oqarpoq. 

Tamatumali Nikkulaat Jeremiassenip tunuartinngilaa:

- Tunuarniuteqarnissannik eqqarsaateqanngilanga. Aamma naalakkersuisooqatigiinnissamut isumaqatigiissutit malillugit suligama qanoq ilisamik tunuassagaluarumaluunniit ilerasuutissaqarlunga misigisimanngilanga.

AAMMA ATUARUK Nikkulaat Jeremiassen isornartorsiuisoqarneranut akissuteqartoq

Naalakkersuisoqatigiit partiivisa annersaata, Siumup, gruppiata siulittaasua, Karl Kristian Kruse, aamma aalisarnermut ataatsimiititaliami ilaasortaavoq. Ataatsimiititaliap nalunaarutaa partiip ataasinngorpat isummerfigissagaa, taanna oqarpoq, namminerli qanoq inassuteqarumaarnerluni oqaatigiumanngilaa.

Nalakkersuisoqatigiit ikorfartortaat, Demokraatit, ataatsimiititaliap tatiginnikkunnaarneranut suli isumminngilaq.

Tamakkulu tamarmik taamaakkallarneranni Nikkulaat Jeremiassenip siulittaasumi aalajangernissaa utaqqimaarniarpaa.

 - Tatiginnikkunnaartoqarnissaa sioqqullugu iliuuseqartoqassappat, iliuuseqartussaq tassaavoq naalakkersuisut siulittaasuat. Taassuma iliuuseqarnissaa utaqqimaarallassavara, aalisarnermut naalakkersuisoq, Nikkulaat Jeremiassen oqarpoq.

KNR-ip Naalakkersuisut siulittaasuat, Kim Kielsen, arfininngornermi attaveqarfiginiaraluarpaa, iluatsinnaguli.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk