Ataatsimiititaliap Nikkulaat Jerimiassen tatigiunnaaraa
Aalisarnermut, Piniarnermut Nunalerinermullu ataatsimiititaliap sapaatip akunnerata siuliani pisuni assigiinngitsuni Aalisarnermut, Piniarnermut Nunalerinermullu Naalakkersuisoq, Nikkulaat Jerimiassen (S) qaleralinniarfiit ilaanni aalisapiluttoqarneranik illuatungaatigullu nungusaataanngitsumik aalisartoqarnerarlugu imminnut assortuuttunik saqqummiussisarnerarlugu uparuarpaa.
Tamatuma kingorna Naalakkersuisoq apriilip ulluisa aappaanni 2019-mi nassiunneqartukkut oqaaseqaatini naqqqiissuteqarfiginiarlugit erseqqissaassuteqarniarsimavoq. Ataatsimiititalialli paasivaa, naqqiissuteqarniarnerigalua suli amerlanernik apeqqutinik pilersitsisoq, sulilu qulaajarneqanngitsoqartoq imminnullu assortuuttoqartoq.
Ataatsimiititaliammi kissaatigisimagaluarpaa Aalisarnermut Naalakkersuisup uparuaanerup imaannaanngissusaanik paasinnissimanissaa, ataatsimiititaliamillu tatigineqaannarumalluni pisinnaasani tamaat iliuuseqarniarsimarsimassagaluartoq. Tamanna pisimanngilaq.
Taamaammat Aalisarnermut, Piniarnermut Nunalerinermullu Naalakkersuisup Ataatsimiititaliamit tatigineerunnera Aalisarnermut, Piniarnermut Nunalerinermullu Ataatsimiititaliap Inatsisartunut ilaasortanut tamanut inuiaqatigiinnullu ilisimatitsissutigisariaqaleraa, Aalisarnermut, Piniarnermut Nunalerinermullu ataatsimiititaliaq taama nalunaaruteqarpoq.