Aalisarnermut ataatsimiititaliaq: Nikkulaat Jeremiassen isornartorsiuisoqarneranut akissuteqartoq
Erseqqissaaneq: Naalakkersuisoq aalisapiluttoqarneraanerarlugu siusinnerusukkut allakkaluarpugut. Taamali allanneq toraartuuinngilaq, tamannalu ajuusaarutigaarput.
Pisut sisamanngormat aallartipput, aalisarneq pillugu naalakkersuisup, Siumumeersup Nikkulaat Jeremiassenip, qaleralinniarneq pillugu imminut assortuuttunik tusagassiuutinut politikerinullu paasissutissiisarsimanerarlugu IA-mit tatiginnikkunnaarluni taasisitseriarneq anigormagu.
AAMMA ATUARUK Aalisarnermut ataatsimiititaliami paatsiveerusimaartut
Taava aalisarnermut ataatsimiititaliap naalakkersuisoq tamatuminngarpiaq tallimanngornermi isornartorsiorpaa.
Siulittaasulli Henrik Fleischerip naalakkersuisumut suli tatiginninnerlutik
ataasinngornermi oqaatigiumanngilaa. Ataatsimiititaliaq Nikkulaat Jeremiassenip qaleralinniapiluttoqarnerarlugu imminnut assortuuttumik nassuiaateqarsimanerminik apeqqutinik akereernissaanut utaqqeqaarusuppoq.
Akissutillu takkupput.
Jeremiassen akissuteqarpoq
- Sisammangorneq 28/3: Inuit Ataqatigiit Naalakkersuisumut Nikkulaat Jeremiassenimut tatiginnikkunnaarnermik taasititsinissamik siunnersuuteqarput. Taanna aalisapiluttoqarneranik tusagassiorfinnut oqarsinnarluni politikerinut allatut nassuiaateqarsimanerarpaat.
Naalakkersuisup tatiginnikkunnaarnermik taasititsinissaq anigorpaa.
- Tallimanngorneq 29/3: Aalisarnermut, Piniarnermut Nunalerinermullu ataatsimiititaaq Naalakkersuisumik isornartorsiuilluni marlunnik tusagassiorfinnut nalunaaruteqarpoq ilaasortat ilaannit atsiukkanik. Nalunaaquttap akunnera ataaseq qaangiummat tusagaasiorfinnut nalunaarutit utertinneqarput allanillu taarserneqarput assinganik imalinnik, tamatumuunali ilaasortanit atsiorneqaratik.
- Ataasinngorneq 1/4: Aalisarneq pillugu ataatsimiititaliami siulittaasup, Henrik Fleischerip apersorneqarluni nassuerutigaa tusagassiorfinnut nalunaarutinut tunngatillugu kukkusimalluni. Ataatsimiititaliap Naalakkersuisumik isornartorsiuinini attatiinnarpaa, Naalakkersorlu tatiginerlugu isummernissaminnut akissuteqarnissaa utaqqillugu.
- Pingasunngorneq 3/4: Naalakkersuisup Nikkulaat Jeremiassenip KNR-imit apersorneqarluni oqaatigaa qaleralinnik aalisapiluttoqarnera §37 naapertorlugu akissuteqaammi oqaatigisimallugu, namminerli oqaatigisimanngisaannarlugu.
Nikkulaat Jeremiassenip §37 tunngavigalugu akissuteqaatimini aalisapiluttoqarneranik ersersitsisoq nassuerutigaa, namminerli nipituumik oqaatigisimanngisaannarnerarpaa.
- § 37-imi akissuteqaatit aallaavigalugit kisitsisit toqqammavigalugit ilaatigut taamatut paasineqarsinnaasumik inissittoqarsinnaavoq, kisianni taanna erseqqissassuara nammineerlunga oqarsimanngisaannarama aalisapiluttoqartoq, Nikkulaat Jeremiassen oqarpoq.
Akissutit paatsiveerusimaarutigineqartut
Arlaleriarlunilu itisileeqqusilluni apeqquteqaraluarluni Nikkulaat qanoq isumaqarpiarnersoq KNR-ip paasisinnaasimanngilaa.
- Aalisapiluttoqarneranik paasineqarsinnaasumik oqariarlutit, taava ullumi oqaqqipputit oqarsimanngisaannarlutit aalisapiluttoqartoq. §37 ullumilu oqaatsit imminnut assortuulluinnarmata paaserusuleringa sorlerpiaq illit isumaginerit?
- Tassa una naalakkersuisutut aalajangiusimavara taanna oqaaseq; nunatsinni aalisapiluttoqanngilaq, Nikkulaat Jeremiassen oqarpoq.
Taava una §37 naapertorlugu akissuteqaatit qanoq paasisassaava?
Taanna tassa immini akissuteqaat aamma §37 akissut suminngaanneerfii aallaavigalugit taanna imaqarpoq, suminngaanneerfik. Nunarput ataatsimut tamaat isigalugu sulisussaagama, Nikkulaat Jeremiassen oqarpoq.
Aalisarnermut ataatsimiititaliami ilaasortat KNR-imit oqaaseqartinniarsarivagut.
