Aalisarnermut ataatsimiititaliami paatsiveerusimaartut
Inuit Ataqatigiit Inatsisartut sisamanngormat ataatsimiinneranni, aalisarnermut piniarnermut nunalerinermullu naalakkersuisumut Nikkulaat Jeremiassenimut tatiginnikkunnaarluni taasisitsinissamik piumasaqaateqareersoq aqaguani tallimanngornermi inatsisartut aalisarnermut, piniarnermut nunalerinermullu ataatsimiititaliaanniit tusagassiutinut nalunaarutit tulleriiginnaat sisamat takkuppuut, tamarmik isumannik assigiinngitsunik imaqartut, siulittasumillu Henrik Fleischerimit atsiorneqarsimasut.
Taakkunani siullerni marlunni Henrik Fleischerip ilaasortallu aqqi tamarmik allattorsimasut Naalakkersuisoq isornartorsiorpaat. Taava akunneq ataaseq qaangiussimatsiartoq tusagassiutinut nalunaarutit marluk siulliit tunuartippaat, allanillu nutaanik oqariartuutitalinnik nalunaaruteqarlutik.
Allaarnerussulli ataaseq erseqqippoq: Taakkunanimi ilaasortat kikkut siulittaasortik, aalisarnermut nalakkersuisumik isornartorsiuinerani, tapersersorneraat takuneqarsinaanngilaq.
KNR-imit Henrik Fleischer oqaaseqartikkumallugu saaffigigatsigu, ataatsimiititaliaq ataatsimeereerpat aatsaat oqaaseqarumaarluni allappoq.
Ataatsimiititaliamut ilaasortat Siumup siulittasuata tullia Karl-Kristian Kruse, Inuit Ataqatigiit siulittasuat Muté Bourup Egede, Demokraatineersoq Steen Lynge kiisalu Partii Naleqqap siulittaasua Hans Enoksenilu KNR-imit oqaaseqartinniaraluaratsigit siulittaasuminnut Henrik Fleischerimut innersuussipput.
Aalisarnermut naalakkersuisoq Nikkulaat Jeremiassen pisoq pillugu oqaaseqarusunngilaq.
