Atassummeersut siulittaasortik naammagiunnaaraat

Atassummut ilaasortat qinersinerup inernera aalassassimaarutigaat, siulittaasualli eqqissisimaneruvoq.

- Qinersivillu una naallugu ingerlanissara siunniutereernikuuara aamma peersitaatinnanga tunualikkersaanngilluaasarpunga, Atassutip siulittaasua isornartorsiorneqarnerminut taama akissuteqarpoq.

Folketingimut qinersinermi Atassut 2,1 procentpointinik kinguariarpoq. Tamanna qineqqusaartitaata Bentiaraq Ottosenip, siulittaasullu tullersortaata Qulutannguaq Berthelsenip naammaginngivippaat.

- Pakatsisorujussuuvunga. Parteerput nikanartunngoqqavoq. Kinguariangaatsiarpugut, maannakkullu partiimi isummagut ersersartariaqarpagut. Annertuumik allannguisoqartariaqarpoq, Bentiaraq Ottosen, Sermitsiaq.AG-mut oqarpoq.  

Partiip siulittaasuata tullia naammagisimaarinninnerunngilaq.

- Atassutillu politikkimik malitassaat ukkatarineqarnerusariaqalerput, oqariaqatuutigisarparpummi Inuk qitiutillugu taannalu sulineq pimoorunnerusariaqalerparput, Qulutannguaq Berthelsen Sermitsiaq.AG-mut oqarpoq.

Tunngavilersuutit taakkua siulittaasup naammagisimaanngilluinnarpai.

- Suliniuteqartut aammalu tamaviaaruteqarneq nuannaarutissaagaluartoq illuatugaanik siulittaasumut pisuussutigitissallugu akikippallaarujussuarpoq, Siverth K. Heilmann taama oqarpoq.

Taassuma Atassutip ataatsimeersuarnissaa suli ullulerneqanngitsoq ukiulli uuma ingerlanerani ukiulluunniit tulliata aallartilaarnerani pissasoq oqaatigaa.