Assit: Siumumi sapaatip akunnerata naanera pissanganartoq naasoq

Erik Jensenip Siumumi siulittaasussatut ippassaq qinerneqarnerani qineqqusaartoqarlunilu taaseqqittoqarpoq.
Kim Kielsen Siumumi siulittaasuujunnaarpoq. Assi © : KNR / Malik Brøns
Vivian Motzfeldt siulittaasunut sassartut pingajoraat. Taanna taaneqannginnerpaalluni taasisinnaasunit 71-init arfineq-marluinnarnit taaneqarpoq. Assi © : KNR / Malik Brøns
Erik Jensen Kim Kielsenimut 32-nit taaneqartumut ajugaalluni 39-nit taaneqarpoq. Assi © : KNR / Malik Brøns
Siulittaasuusimasoq saamerlermi siulittaasup tullersortigisimasaa Karl-Kristian Kruse talerperlermi. Assi © : KNR / Malik Brøns
Erik Jensen aamma Vivian Motzfeldt Erik Jensenip siulittaasutut qinerneqarnerata kingorna Siumut erinarsuutaasa ilaannut qitittut.
Taasinerit kisinneqartut. Assi © : KNR / Malik Brøns
Allattoq Christine Hyldal
novembarip 30-at 2020 14:39
Nutserisoq Connie Fontain

Siumumi sapaatip akunnerata naanera pissanganartoq qaangiuppoq, siulittaasumillu nutaamik toqqaasoqarluni.

Kim Kielsen Siumumi 2014-imili siulittaasuulerpoq, maannali siulittaasuujunnaarpoq.

Erik Jensen partiimi siulittaasunngorpoq, taanna 39-nit taaguunneqarluni Kim Kielsen 32-nit taaguunneqarpoq.

Inuulluarit, qujanaq pilluarillu. Siulittaasuusimasup siulittaasunngortoq pilluaqqugaa. Assi: Malik Brøns

 

Kim Kielsen maannakkutut isikkoqartillugu naalakkersuisuni siulittaasuuginnassaaq. Siumumi siusinnerusukkut Siumut naalakkersuisuniinnerani partiimi siulittaasoq aamma naalakkersuisuni siulittaasuunnginnikuuvoq.

AAMMA ATUARUK Erik Jensen Siumumi siulittaasunngortoq

Lars-Emil Johansen 1988-imit 1991-imut Siumumi siulittaasuuvoq Jonathan Motzfeldtilu namminersornerullutik oqartussani taamani siulittaasuulluni.

Maannali qanoq pisoqassanersoq erseqqissumik akissuteqarfigiuminaappoq.

AAMMA ATUARUK Immikkut ilisimasalik: Taamaammat Kim Kielsen Erik Jensenimut ajorsarpoq

Inuiaqatigiilerinermut ilisimatuup, Rasmus Leanderip Kim Kielsen Naalakkersuisut siulittaasuatut issiaannarsinnaanissaa ilisimaginngilaa.

Kim Kielsenili oqaaseqarusunngilaq.

Siulittaasunngortup siulittaasuusimasoq saneqqukkaa. Assi: Malik Brøns

 

- Tamakkua massakkut oqaatigisinnaanngilagut. Massakkut Siumut siulittaasortaarpoq, taava siulersuisunngortussat ingeriarlutik oqaloqatigeeriarlutik apuussaqartussaassapput. Siumup ataaniippugut, siulersuisuunerit qullersaraagut, Kim Kielsen siulittaasuujunnaaqqammerluni KNR-imut oqarpoq.

Allatut oqaatigalugu: Susoqarnissaa siulersuisuunerit maanna aalajangertussanngorpaat. Kim Kielsen Naalakkersuisunit tunuarnissani atuuffiullu Erik Jensenimut eqqissisimasumik tunniunneqarnissaa aalajangersinnaavaa.

AAMMA ATUARUK Kim Kielsen siulittaasunngunngitsoq: Oqiliallannaq

Aamma atuuffimmiiginnarsinnaavoq, qinersisoqarnissaanillu aalajangiisinnaalluni.

Qanorli pisoqarnissaa nalileruminaatsoq, Rasmus Leander isumaqarpoq.

- Inatsisartuni februaarimi ukiakkut ataatsimeeqqittoqartinnagu qinersisoqassanersoq imaluunniit Kim Kielsenip atuuffik iperarusunneraa apeqqutaavoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk