Assigiinngisitsivigineqartutut misigisimaguit naammagittaalliorsinnaanngorputit

Assigiinngisitsinnginnissamut inatsit inatsisartut akuerimmassuk, naligiimmik pinninnissaq pillugu aalajangiisartunik nunatsinni siullerpaamik pilersitsisoqartussanngorpoq.

Maannalu pilersinneqareerpoq.

Naligiissitaanermi assigiinngisitsinnginnissarlu pillugit inatsit juulip aallaqqaataani atuutilerpoq, naligiimmillu pinninnissaq pillugu aalajangiisartunut ilaasortat ulloq taanna toqqarneqarlutik.

Taakkua nunatsinni innuttaasut suiaassuseq, inuianni kingoqqiffik, ukiut politikkikkulluunniit isummat pillugit eqqunngitsumik pineqarsorigunik naammagittaalliuutaat suliarisartussaavaat.

- Innuttaasunut allanut sanilliullutit allaanerusumik ajornerusumillu pineqaruit naammagittaalliorsinnaavutit, niuernermut, aatsitassanut, inatsisit atuutsinneqarnerannut naligiissitaanermullu naalakkersuisoq, Naaja Nathanielsen (IA) oqarpoq,

- Imaassinnaavoq naartuneq pissutigalugu suliarisartakkanik suliaqarunnaarsitaasoqarsinnaavoq qaffasinnerusumulluunniit atorfinitsinneqarnani, Naaja Nathanielsen oqarpoq, nangilluni:

- Aamma imaassinnaavoq innarluuteqaraanni innarluutillit allat assigalugit sullinneqanngitsutut misigisimasoqarsinnaasoq.

Ima naammagittaaliortoqarsinnavoq

Assigiinngisitsinermik pineqartutut misigigaanni qanoq iliortoqassava?

Qujanartumik suliassaq anikitsuinnaasoq, Naaja Nathanielsen oqarpoq.

- Naligiimmik pinninnissaq pillugu aalajangiisartut atuisartut unammilleqatigiinnermullu aqutsisoqarfiup allaffeqarfiani allaffeqassapput.

Innuttaasut assigiinngisitsinermik arlaatigulluunniit misigisaqarsimagunik taakkununnga saaffiginnissinnaapput.

Tamatuma kingorna naammagittaalliuutigineqartoq naligiimmik pinninnissaq pillugu aalajangiisartunut ingerlateqqinneqassaaq.

Nittartakami uani:Atuisartoqarnermut Unammilleqatigiinnermullu Aqutsisoqarfik -mi immersugassamik immersorneqarsinnaavoq nassiullugulu.

- Mailikkut allakkatigulluunniit nassitsisinnaavutit. Aamma sianersinnaavutit allaffeqarfimmulluunniit saaffiginnissinnaavutit, Naaja Nathanielsen nassuiaavoq

Inuiaqatigiinni kiffartuussineq

Naligiimmik pinninnissaq pillugu aalajangiisartunut naammagittaalliornissap iluaqutigivaa, assigiinngisitsinermik pineqarnerluni pineqannginnerluniluunniit naammagittaalliornikkut qulakkeerneqassammat, Naaja Nathanielsen oqarpoq.

- Naammagittaalliutillu ilumoortuutinneqarpat, tamanna illit ataqqinassutsivit innarlerneqarunnaarnerissavaa ilinnullu ikorfartuutaalluni. Ilinnut immaqalu aamma allanut sinniisuuffigisannut, Naaja Nathanielsen oqarpoq.

- Taamaaliorneq imminut inuiaqatigiinnullu kiffartuussinerussaaq.

Naaja Nathanielsenip aamma erseqqissaatigaa, inatsimmi nutaami pineqaatissiinissamut periarfissaqartoq, assigiinngisitsisunut kinguneqartitsisoqarsinnaalluni.

- Taava naligiimmik pinninnissaq pillugu aalajangiisartut aalajangiinerat tunngavigalugu eqqartuussivinnut suliassanngortitsisoqarsinnaavoq. Naligiimmik pinninnissaq pillugu aalajangiisartunit tapersersorneqaraanni eqqartuussivinni suliani pitsaanerusumik inissisimasoqassaaq.

Naammagittaalliutigineqartut qanoq sivisutigisumik suliarineqartarsinnaassanersut maannakkut oqaatigissallugu siusippallaartoq, Naaja Nathanielsenip erseqqissaatigaa.

- Saaffiginnissutigineqareersut qassiunersut, periarfissaasorlu paasineqariarpat saaffiginnissutigineqartussat qassiussanersut maaannakkut ilisimanngilarput, Naaja Nathanielsen periarfissamik atorluaanissamik kaammattuuteqartoq oqarpoq.

- Soqutigineqarluarpat aalajangiisartuni sulisut taakkununngalu tunngasunik suliaqartut ikiorneqartariaqarnersut takujumaarparput.