Nunarput naligiissitaaneq assigiinngisitsinnginnissarlu pillugit siullerpaamik inatsiseqalersoq

Nunarput naligiissitaaneq assigiinngisitsinnginnissarlu pillugit siullerpaamik inatsiseqalerpoq. Tamanna Inatsisartuni amerlanerussuteqartut akuersineritigut upernaakkut ataatsimiinnermi marlunngornermi aalajangerneqarpoq.

Inuit Pisinnaatitaaffii pillugit Siunnersuisoqatigiillu tamanna nuannaarutigilluinnarpaat.

- Naligiissitaaneq pillugu inatsit tunngaviulluinnarpoq uagut inuiaqatigiittut inuit pisinnaatitaaffiinik eqqortitsisinnaanitsinnut, taamaattumillu ullumikkut inatsisip akuersissutigineqarnera misigisaavoq nuannerluinnartoq, Siunnersuisoqatigiit siulittaasuat, Qivioq Løvstrøm tusagassiuutinut nalunaarummi allappoq.

Inatsisissatut siunnersuut naalakkersuisunit 2023-mi upernaakkut ataatsimiinnermi siullermik siunnersuutigineqarpoq. Tamanna Inuit Pisinnaatitaaffii pillugit Siunnersuisoqatigiit inatsisip atuuttup amigarneranik isornartorsiuereernerata kingorna pivoq.

Assigiinngisitsinermi assigiinngitsorpassuarnut ullumikkut siammarsimavoq, taannali maanna naligiissitaanermut assigiinngisitsinermullu inatsisip ataaniilissalluni.

Naammagittaalliuteqarnissaq ajornannginnerussasoq

Naalakkersuisut tamatuma saniatigut naammagittaalliuteqartarfimmik Naligiissitaaneq pillugu aalajangiisartunik taaguuteqartussanik pilersitsiniarput, tassannga assigiinngisitsisoqarsimanersoq taarsiissuteqartoqassanersorlu aalajangerneqartassaaq.

Ullumikkummi assigiinngitsitsinermik nalaataqarsimagaanni eqqartuussivik aqqutigineqartartussaavoq.

Naammagittaalliuulli pisortanit assigiinngisitsisoqarneranut tunngassuteqarpat Inatsisartut Ombudsmandianut naammagittaalliuteqartoqarsinnaavoq. Uanilu innuttaasoq assigiinngisitsiffigineqarsimaguni taarsiissuteqarfigineqarsinnaanngilaq.

- Iliuuserisarput tassaavoq, inatsisinik pioreersunik ataatsimut inatsisinngortitsineq, taamaaliornitsivut assigiinngisitsinnginnissaq pillugu inatsit naammagittaalliorfissartalik, ataatsimoortoq pigilissavarput, Inuutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen (IA) KNR-imut septembarimi oqarpoq.

Naleraq inatsisip taasissutigineqarnerani kisimi taasinngilaq. Naleqqap siulittaasuata, Pele Brobergip inatsisip kimut iluaqutaanissaata kimillu illersuinissaata ersarinnginnera siorna upernaakkut ataatsimiinnermi isornartorsiorpaa.

Inatsit nutaaq ”suiaassutsip, naartunerup, meeravissiartaarnerup, erninermi sulinngiffeqarnerup, kinguaassiutitigut sammiviup, suiaassutsini kinaassuseqarnerup, suiaassutsimik takutitsinerup, suiaassutsit ilisarnaataasa, kingoqqiffiup, ammip qalipaataata, inuiaqatigiinni, inooqatigiinnermi imaluunniit inuianni pinngorfiup, innarluuteqarnerup, ukiut, politikkikkut isiginnittaatsip, upperisap imaluunniit upperisaqarneq” apeqqutaatinnagit assigiinngisitsinnermut pinaveersaartitsissutaallunilu naligiissitsinissamik qulakkeerutaassasoq, inatsimmi allassimavoq.