Assammik arsarneq: Nuummi VM-mut anngunniuttoqarnissaa qanilliallaqqippoq

Inatsisartut aningaasaqarnermut ataatsimiititaliaata akuereqqammerpaa timersornermut immikkut ittumik 1 million koruuninik aningaasaleeqqittoqassasoq.

Aningaasat atorneqassapput assammik arsarnermi arnat aappaagu VM-mut anngunniuteratarsinnaanerannut tassanilu iligiit Amerikap avannaamiut Caribiamiullu peqataassapput.

AAMMA ATUARUK Arnat VM-mut Nuummi anngunniussinnaanerat qanilliallappoq: Kommune aningaasaleeqataajumavoq

- Aasarli assammik arsartartut kattuffiat attaveqarfigaarput taakkulu apeqquteqaatigaat aaqqissuisuunissamut 1 million koruuninik aningaasaliisinnaanersugut, ilinniartitaanermut, kultureqarnermut, timersornermut ilageeqarnermullu naalakkersuisoq Peter Olsen KNR-mut oqarpoq.

- Aningaasaqarnermut ataatsimiititaliap qanittumi akuersissutigivaa immikkut ittumik 1 million koruuninik aningaasaliisoqassasoq. Taamaattumik neriuppunga tapiinitsigut suliniutip piviusunngortinnissaa qanilliallassinnaassasoq, Peter Olsen oqarpoq.

AAMMA ATUARUK Nunatsinni arnat assammik arsartartut sølvinnammata Naalakkersuisunit nersorneqartut

Assammik arsartartut kattuffianni TAAK-mi siulittaasoq Carsten Olsen Naalakkersuisut tapiinerannut qujamasuppoq. Kommuneqarfik Sermersooq aamma Nuummi VM-mut aappaagu anngunniuttoqarsinnaaneranut 1 million koruuninik aningaasaleereerpoq.

Akiitsorpassuit pinaveersaarpaat

Aningaasatigulli toqqammavissat suli qulakkeerneqanngillaat naak annertuumik alloriartoqaraluartoq.

Angutit 2018-mi Nuummi VM-mut anngunniunneranni PAN-AM 2018-mi misilittakkat maanna iluaqutaasinnaapput.

- PAN-AM 2018-mi misilittakkat maannalu tapersersorneqarnerput tunngavigalugu assartuinermut ineqartitsinermut ullutsinni akit atuuttut pissarsiarisariaqarpagut taakkuussagunarmata aningaasartuuteqarfiunerpaajusussat taamaasereerpallu suliuniut aallartivissanersoq siulersuisuni isummerfigissavarput, Carsten Olsen oqarpoq naallu aaqqissuisuunissaq neriuutigigaluarlugu TAAKp akiitsorpassuaqartilernissaa pinngitsoorniarpaa.

- Malunnarpoq suut tamarmik akitsoriartortut assersuutigarlugu aningaasat pisissutaasinnaanerisa apparnerat Ukrainemilu sorsuuttoqarluni. Tamanna eqqumaffigeqqissaartariaqarparput assammik arsartartut kattuffiat aningaasaqarniarnikkut ilungersunartumik inisseqqunagu. Suliniut qanoq akeqassanersoq paasisariaqarparput nunat peqataasussat maannartissinnaanngorutsigit aatsaat akuersisinnaagatta, Carsten Olsen oqarpoq.

Inussivimmi pikkusunneq

Angutit VM-mut anngunniunnerat 2018-mi Nuummi pivoq taamanikkullu kalaallit unammigaangata aqquserngit inueruttarput timersortarfissuarlu Inussivik pikkusuffiusaqaluni.

- Angutit nunanut allanut unammisartut ataatsimoortippaatigut, nuannatsilluta pissangatillutalu. Taamaattumik neriuppunga arnartavut taamatut aamma misigisinnaajumaarivut, Peter Olsen oqarpoq.

AAMMA ATUARUK Iligiit aqutsisuat sølvinnareeramik: Piumarsuaaraluaqaagut

Carsten Olsenip aamma qularinngilaa aaqqissuussisuunerup innuttaasut ataatsimoortikkumaarai.

- Inussivik inunnik immerluarumaarparput aqquserngillu nuna tamakkerlugu inuisallutik soorlu 2018-mi, Carsten Olsen oqarpoq.

Nunarput Amerikap avannaani assammik arsartartut kattuffianni NACHC-mi ilaasortaavoq. Nunat tassani peqataasinnaasut ilagaat USA, Cuba, Mexico, Puerto Rico, Dominikanerit kunngiitsuuffiat aamma Canada.

AAMMA ATUARUK Finale: Puerto Rico kuultinnattoq - nunarpullu sølvinnalluni

Siorna Puerto Rico VM-mut annguppoq Spaniami VM-rtoqarnissaanut inissaq ataaseq anngunniussutigineqarmat finalemi kalaallit ajugaaffigalugit.