Angutit nunanut allanut unammisartut: Piukkunnarsarneq iluatsilluartoq
Angutit nunatsinneersut isikkammik arsarlutik nunanut allanut unammisartut, sapaatip akunnerata siuliani, Tyrkiameereerlutik nunatsinnut uterput.
Unammisartut unammisaqattaarnerat pikkorissarnerallu iluatsilluartutut nalilersinnaavakka, nunatsinni nunanut allanut unammisartunut sungiusaasoq oqarpoq.
- Ilimagisanniit pissarsiaqarneroqaangut. Ingerlanneqarnerata inernera naammagisimaarnarpoq. Unammisartut piginnaasaminnik qaffasissumik takutitsilluaqaat, nunatsinni angutinik nunanut allanut unammisartunik sungiusaasoq, Mortan Rutkjær oqarpoq.
Piukkunnarsarfiusuni unamminerit pingasuupput, nunarpullu unamminerni pingasuni marlunnut ajugaapput. Turkmenistanimut unammineq siulleq pivoq, taakkulu FIFA-mi 143-llutik inissisimapput, taakkulu nunatsinnut 5-0-imik ajugaapput.
Unamminerup qiteqqunnissaanut isertitsisoqanngiivissimavoq, tamannalu Mortenip naammagisimaarluinnarpaa. Unamminerillu tullinnguuttut marluk, Tyrkiamiut timersoqatigiivinut ajugaaffiginninnerujussuusimapput, siullermi 9-1-imik tullissaanilu 7-1-imik nunatsinneersut ajugaallutik.
Takutitsilluarneq
Nunatsinneersut nunanut allanut unammisartut, inuusuttortaqangaatsiarmata siunissaat ernumananngilluinnarpoq.
- Sisamat tallimat missaanniittunik 16-it 19-illu akornanni ukiulinnik peqataatitsivugut, taakku akisussaaqataallutik unammeqataalluarput, tamannalu nuannaarutigaara, Morten Rutkjær oqarpoq.
Inuusuttuinnaanngillalli nununatsinni nunanut allanut unammisartunut sungiusaasumit nuannaarutigineqartut.
Unamminerni ajugaaffigisaminni imminnut tatigeqqilersimapput, sungiusarnikkullu piukkunnarsaatigisimasatik unamminermi misilippaat. Unamminernimi saassussinerit arsamillu paarsinerit qitiutinneqarsimapput.
Tyrkiami 45 graderinik kiassimavoq, tamanna tupaallannertuuvoq, unammisartummi sungiusimasaannit kiannerujussuusimavoq, tamannali akornutissaannaasimanngilaq.
- Unammillernartuuvoq, kisianni iluaqutissatut pivarput. CONCACAF-imummi ilanngutissangutta, tamanna unamminerni peratarsinnaavoq. Caribiameersut unammisalersinnaavangut, taakkulu nunamit kiattumeersuupput, nunatsini nunanut allanut unammisartunut sungiusaasoq oqarpoq.
Massa sila kiarujussuarsimangaluartoq, sungiusaasunut unammisartunullu sungiusarneq atugarissaarfiusimavoq.
- Unammisartut saaffiginnittarput suli piumallutik, tamannalu uggornaannarpoq. Una piukkunnarsarluni unammineq, ukiumi uani angalanituaassaaq, aningaasaqarnikkummi taanna kisimi naatsorsuutigineqarpoq, Morten Rutkjær oqarpoq.
Siunissaq eqqarsaatigalugu nunatsinni sungiusaasup neriuutigaa, nunanut allanut unammisartut, piukkunnarsarlutik angalaqqittuarnissaat ineriartortinneqassasoq.
