Island Games: Kalaallit arsaattartut peqataassanngillat
Qeqertarmiut timersortartut 2.000-nit amerlanerusut qeqertanit 24-neersut tuluit qeqertaanni Orkney-mi aappaagu julimi unammilerpata kalaallit arsaattartut peqataassanngillat.
Pissutaasoq Orkney-niippoq Skotlandip kujatinnguani.
Pisussarmi tassaavoq Orkney-mi aaqqissuussaasartut maannamut annertunersaat illoqarfiillu anginersaat Stromness 2.000-nik innuttaqartoq najugaqartitsiniarnikkut ajornartorsiulereerpoq.
- Unnuiffiusinnaasut killeqarput. Taamaattumik ilimagisariaqarparput peqataasut ilaat illuinnarni ilaatigullu illuinnarni angajoqqaarsiaqarlutik najugaqartariaqassasut, Kalaallit Nunaanni timersoqatigiit kattuffianni GIF-mi ineriartortitsinermut pisortaq Poul Petersen KNR-mut oqarpoq.
Siullertut paarlatsissamaatit
GIF-mi allattuuneq Jonas Jensen peqatigalugu aasaq Orkney-mi tikeraarput qeqertat aappaagu Island Gamesimi peqataasussat allat aqutsisui peqatigalugit.
Najugaqarniarnikkut periarfissat killeqarnerat kalaallit peqataatitassaannut killiliivoq.
Angutini arnanilu arsaannerni iligiit aqqaneq marluk taamaallaat peqataasinnaapput. Kingullermik pissartaasut aamma aaqqissuisut peqataanissaat qulakkeerneqareerpoq.
- Taamaattumik makitsisoqarnikuuvoq ajoraluartumillu kalaallit angutit arnallu makitaanngillat, Poul Petersen oqaluttuarpoq.
Nunat peqataasussatut makitaasut kingusinnerpaamik septemberip naanerani nalunaartussaapput ilumut peqaanissaq aalajangiusimanerlugu.
Peqataasinnaajunnaartoqassappat paarlatsissatut siullertut kalaallit arnat inissisimapput angutillu paarlatsissamaatini allersaallutik.
Nunatsinniit peqataanissamut inissanik qulakkeeriffigineqareersut tassaapput sulorartartut, arpattartut, naluttartut kiisalu golfertartut.
