Aajuku Island Gamesimi arsaannermi Nunatta unammisitassai

Arsaannermi nuna tamakkerlugu sungiusaasoq Morten Rutkjær Nuummi sungiusaqatigiittoqareersoq Island Gamesimi unammeqataasussanik toqqaavoq.
Island Gamesimi unammeqataasussat toqqarneqarnissaat sioqqullugu arsaannermi nunanut allanut unammisartut Nuummi sungiusaqatigiipput. Assi © : KAK
Allattoq Noah Mølgaard
maajip 31-at 2023 14:22

Arsaannermi kalaallit nunanut allanut unammisartui Island Gamesimi unamminermi siullermi juulip qulingiluaanni Skotlandip avannaamiunut Orkneymut unammissapput.

Maannalu Island Gamesimi unammeqataasussat toqqarneqarput.

Island Gamesimi arsaannermi unammisussat

 

Aquttut:

Brian Rosing Kleist

Peter Berthelsen

Assersuisut:

Aiko Elgård Nielsen

Morten Fleischer

Inooraq Svendsen

Jørgen Kreutzmann

Karsten Møller Andersen

Katu Madsen

Mika Jensen Thyssen

Nukannguaq Zeeb

Arsaaffiup qeqqaniittut:

Patrick Otiri Frederiksen

Mads Andersen

Nikki Petersen

Aputsiaq Andersen

Søren Kristiansen

Søren Kreutzmann

Siukkat:

Nemo Thomsen

Rene Eriksen-Petersen

Niklas Thustrup Johansen

Niels-Erik Eriksen

Sungiusaasut:

Morten Rutkjær

Morten Hamm

Mikkel Kvist Willumsen

Silami arsaanneq Island Gamesimi 2017-ip kingorna aatsaat unammissutigineqassaaq. Timersuut taanna nunarsuarmi timersuutini nuannarineqarnersaasoq qeqertarmiut unammiuaarnerat 2019-mi Gibraltarimi pimmat unammissutigineqanngilaq.

Taamaattumik nunat unammeqataasussat kakkassusaannut paasissutissanik pissarsiniarneq ajornakusoorpoq.

- Bermuda Amerika avannarlermiut unammineranni Nations Leaguemi marloriarluni unammisimasoq videokkut isiginnaarparput. Arsariaasiat qanorlu kakkatsiginersut nalilersorparput, nuna tamakkerlugu sungiusaasoq Morten Rutkjær KNR-mut oqarpoq.

Bermudap aamma Orkneyp saniatigut kalaallit unammisassaraat norskit qeqertaat Froya 2017-mi Island Gamesimi alliit ilaattut inissittoq.

- Bermudap saniatigut unammisassavut allat pillugit paasissutissanik katersileruttorpugut, Morten Rutkjær oqarpoq.

- Immitsinnut aallaavigaluta arsariaaseqartarpugut. Soorunami unammisavut isiginiartarpavut taakkulu aaqqissuussaanerat akornusersorniartarlugu, Morten Rutkjær oqarpoq.

Unammeqataasussatut toqqakkat sungiusarnermi najoqqutassaannik tunineqarput tamannalu Guernseymut aallarnissap tungaanut malinneqassaaq.