Aajuku Island Gamesimi arsaannermi Nunatta unammisitassai
Arsaannermi kalaallit nunanut allanut unammisartui Island Gamesimi unamminermi siullermi juulip qulingiluaanni Skotlandip avannaamiunut Orkneymut unammissapput.
Maannalu Island Gamesimi unammeqataasussat toqqarneqarput.
Silami arsaanneq Island Gamesimi 2017-ip kingorna aatsaat unammissutigineqassaaq. Timersuut taanna nunarsuarmi timersuutini nuannarineqarnersaasoq qeqertarmiut unammiuaarnerat 2019-mi Gibraltarimi pimmat unammissutigineqanngilaq.
Taamaattumik nunat unammeqataasussat kakkassusaannut paasissutissanik pissarsiniarneq ajornakusoorpoq.
- Bermuda Amerika avannarlermiut unammineranni Nations Leaguemi marloriarluni unammisimasoq videokkut isiginnaarparput. Arsariaasiat qanorlu kakkatsiginersut nalilersorparput, nuna tamakkerlugu sungiusaasoq Morten Rutkjær KNR-mut oqarpoq.
Bermudap aamma Orkneyp saniatigut kalaallit unammisassaraat norskit qeqertaat Froya 2017-mi Island Gamesimi alliit ilaattut inissittoq.
- Bermudap saniatigut unammisassavut allat pillugit paasissutissanik katersileruttorpugut, Morten Rutkjær oqarpoq.
- Immitsinnut aallaavigaluta arsariaaseqartarpugut. Soorunami unammisavut isiginiartarpavut taakkulu aaqqissuussaanerat akornusersorniartarlugu, Morten Rutkjær oqarpoq.
Unammeqataasussatut toqqakkat sungiusarnermi najoqqutassaannik tunineqarput tamannalu Guernseymut aallarnissap tungaanut malinneqassaaq.
