Aajuku arpannermi Island Gameseqataasussat

Arpannermi nuna tamakkerlugu sungiusaasoq Uju Petersen angutinik sisamanik arnanillu marlunnik aasamut Island Gameseqataasussanik toqqaavoq.
Hans Brummerstedt Danmarkimi najugaqarlunilu sungiusartarpoq Assi © : Hans Brummerstedt
Allattoq Noah Mølgaard
maajip 23-at 2023 10:46

Qeqertarmiut aasamut unammiuaarnissaanni Island Gamesimi Nunatsinniit timersoriat aqutsisullu 74-ussapput taakkunannga arpagiartussat aqutsisortik ilanngullugu arfineq marluussapput.

Toqqarallakkat angutit arfineq pingasuugaluartut arnallu arfinillit misitsittoqartarneratigut ikisinneqarlutik maanna tassaalerput angutit sisamat arnallu marluk.

- Timersoqatigiit kattuffiata piumasaqaatai aallaavigalugit arpattartut misiligarneqarput. Toqqarallakkani angutit naligiittorujussuupput taamaattumik ikiortiga Flemming Enequist suleqatigalugu nalilersuinerit ingerlapput, arpannermi nuna tamakkerlugu sungiusaasoq Uju Petersen KNR-mut oqarpoq.

Island Gamesimi arpaqataasussat

Nivi Geisler, Nuuk
Rikke Rysgaard, Ilulissat
Rene Anda Nielsen, København (Nuuk)
Michael Clasen, Nuuk
Inuk Møller, Aarhus (Nuuk)
Hans Brummerstedt, København (Nuuk)

Sungiusaasoq: Uju Petersen


Ingerlaqqittut ikipput

Arnat marluinnaat piumasaqaatit naapertorlugit toqqagaapput.

- Island Gamesimi isorartussutsit unammeqataaffissagut najoqqutaralugit naleqqussartariaqarsimavugut. Aamma toqqaaniarnermi arpattartut kissaataat tusaaniarneqarsimapput, Uju Petersen oqarpoq.

Isorartussutsini 5.000 meterimi aamma 10.000 meterimi unamminerit arpaffissiami pisussaapput halvmaraton 21 kilometeriusoq tuluit qeqertaata unammiffiusussap Guernseyp aqquserngisigut pisussaalluni.

Arpaffissiani arpannermi killilimmik misilittagaqarneq unammillernartitsinnaavoq Nunatsinni suli arpaffissianik peqanngimmat.

- Aningaasaliisussarsiornermi ajoraluartumik kingusinnaarreerpugut tamannalu naammagiinnartariaqarlugu, Uju Petersen oqarpoq.

- Iluatsitsinerinnarmilli toqqagaasut pingasut maanna Danmarkimi najugaqarallarput. Taakku tassaapput Rene Anda Nielsen, Inuk Møller aamma Hans Brummerstedt. Taakku aqqusinertigut arpannermi saniatigut arpaffissiani sungiusarneq unamminermi misiligarpaat tamannalu nuannaarutigeqaarput, Uju Petersen oqarpoq.

Oqilalluinnartut

Island Games sioqqullugu ilungersuullugu sungiusartoqartariaqassaaq.

Kingullermik Island Gamesimi angutit 5.000 meterimut ajugaasut minutsit 15-it sekundillu 24-it arpappoq 10.000 meterimullu ajutaasoq minutsit 32-it sekundillu arfinillit arpalluni.

- Immikkut pissanngatigivara Rene Anda Nielsen taanna siornatigut Island Gamesimi peqataareernikuummat. Neriuppunga isorartuumut arpannermi tupaallatsitsisoqarsinnaassasoq, Uju Petersen oqarpoq.

Siornatigut Island Gamesimi angutini arnanilu arpannermi Nunatsinneersut ujaminnattarput.