Ujamminut arpalersorpoq

Liza Tuperna Itzchakyp suli 2009-mi ajugaasup piffissaq atugaa inungaatsiarpaa, taamanikkut Louise Perrio Guernsey-meersoq 10.000 meterimut ajugaanermini 37,53 minutsit atorpai. Liza Tuperna Itzchaky qanittukkut tassunga isorartussutsimut arpakkami atorpai 39,42 minutsit, taamaattorli ujaminnariarnissamut piareersimanerarpoq.

Atletikkertartut nunarput sinnerlugu 2009-mi Island Gamesimi unammeqataasut ujaminnanngillat. 10.000 meterimut arpannermi Britt Folkermann taamani normu 9-uvoq, 5.000 meterimullu arpannermi Katti Frederiksen normu 10-ulluni. Tassuuna takuneqarsinnaavoq unammisassaat imaannaanngitsuusut.

Liza Tuperna Itzchaky ukiormanna kisiartaalluni atletikkimi unammeqataassaaq Isle of Wightimilu Island Gameseqarnissaanut piaarersarnini maanna naammassingajalerpai.

- Neriuppunga sungiusarluarnikkut, unammillaqqinnerulernikkut immaqalu aamma 1-2 kilomik oqilinikkut Island Gamesimut anguniakkannut qanilliallassinnaallunga, Liza Tuperna Itzchaky taama oqarpoq, anguniarpaalu ujaminnannissani.

Royal Greenlandip aningaasaliisuuneratigut periarfissaqalersimasoq Richard Hjortebergip immikkut sungiusaasorilernissaanut. Taassuma takisuumut arpattartut arlallit soorlu Anne Mette Aagaard Walter aamma Lene Hjelmsø sungiusartarsimavai kingullerlu qanittumi Nykredit løbimi ajugaavoq atorlugit 36,11 minutsit.

- Suli iluarsisassaqarpunga pisinnaasaralu tamaat angummanniarsarivunga, Liza Tuperna Itzchaky oqarpoq, taannalu juunip 29-at 10.000 meterimut arpassaaq juulillu aallaqqaataani 5.000 meterimut arpattussaalluni.