Iligiit aqutsisuat sølvinnareeramik: Piumarsuaaraluaqaagut

- Ippassaq unammineq aallartimmalli soorluuna aallaqqaataaniilli iluatitserpianngitsugut. Piumarsuaaraluarluta piareersarluaraluartulu ajoraluartumik iluatitsinngitsoorpugut.

- Pakatseqqaqaagut soorunalimi aamma neriuuteqaraluaratta nalunagu unammillersinnaallutigit. Taava naammassimmat aliasoqaagut, pakatsivugut nuanniilliorlutalu ajoraluartumik.

Assammik arsarlutik nunanut allanut unammisartuisa aqutsisuat, Andrea Heilmann KNR-imut oqarpoq.

Kalaallit Nunaaneersut, Amerika Avannarlermiut Caribiamiullu pissartanngorniunneranni, Puerto Ricormiunut ippassaq pingasunngornermi unammivoq.

Kalaallit Puerto Ricomut 24-34-mik ajorsarput.

AAMMA ATUARUK Finale: Puerto Rico kuultinnattoq - nunarpullu sølvinnalluni

Unammineq aallartimmalli Puerto Ricormiut sukkassusaanut teknikkikkullu pikkorissusaanut kalaallit malinnaasinnaarpiaratik isertitsineq ajulerput .

Unamminerup affaata siullermi Puerto Rico 10-18-nik siuttooreermat, kalaallit assammik arsaattartuisa unamminerup affaata naggataani iluatsitsiffigisinnaasimanngilaat.

Puerto Ricormiut assammik arsartartui misilittagaqarluarnerisa unamminerup inerneranik aalajangiisuussoq, assammik arsartartut iligiinni siuttua oqarpoq.

- Ilimagisinnaavara uanga nammineerlunga misilittagakinneq. Uku unammisagut inuusuttuaraallutilli ilagiinnikuupput, taavalu unammiartuaannartuullutik. Taannartaa ilimagilaarsinnaavara, Andrea Heilmann oqarpoq.

Massakkumiit sungiusartoqassasoq

Nunatsinni arnat assammik arsartartut unammiuaarnerni aatsaat taama angusarissaartigipput. Taamaammat nunarput pissartanngorniunnermi aamma siullermeertumik aatsaat sølvinnappoq.

Arsartartut sølvinnannertik angusartillu nuannaarutigigaluaqalugu, iligiit aqutsisuata pakatsinera ersarippoq.

- Soorunalimi nuannaarutigaarput, kisianni aamma finalimut annguteriaratta taava soorlu naammatsigata. Taamaattumik neriussimagaluarpugut unammineq kingulleq aamma ajugaassallutigu.

AAMMA ATUARUK Ukiut sisamat matuma siorna medaaliannanngillat: Maanna nunarput peqataallualerpoq

Amerika Avannarlermiut Caribiamiullu akornanni ukiut marluk qaangiuppata pissartanngorniuttoqaqqissaaq. Assammik arsartartut taamanikkussamut ilungersornerullutik sungiusartariaqartut, Andrea Heilmann oqarpoq.

- Massakkumiit angerlarutta soorunalimi eqqissisimalaariarluta taava piareersarnerit massakkumiit aallartittariaqassavagut. Ukiut marluinnaapput, sungiusarneq nukkassarnerit sungiusaqatigiinnerillu ingerlattariaqassavagut massakkumiit.

- Tunniutiinnanngilagut suli piumavugut.

Nunarput kuultinnanniaannanngilaq. Unamminermi ajugaaneq pissartanngorniunnerlu Spaniami assammik arsarnermi nunarsuarmi pissartanngorniunnissamut aamma periarfissiivoq. Puerto Ricolu pissartanngorniutivikkiartortussanngorluni.

Nunatsinneersut USA-mi Chicagomi unammiuaarnerni ingerlalluarput. Unamminerminnimi Mexicomut, USA-mut Puerto Ricomullu ippassaani ajorsartinneqaratik ajugaapput.

Puerto Ricolu ippassaq unnukkut pissartanngorniunnermi unammivaat. Kalaallit arnartaat assammik arsarlutik nunanut allanut unammisartuisa ippassaani 26-23-mik ajugaareeraluartoq unammeqqippaat. Puerto Ricomeersummi nunatsinneersutulli unamminermi pissartanngorniunnissamut aamma qulakkeerinnereerpoq.

Puerto Ricomeersulli ippassaq unnukkut unammersuaarnermi angusarissaarnerupput.