Ukiut sisamat matuma siorna medaaliannanngillat: Maanna nunarput peqataallualerpoq
Taamaakkaluartorli amerikap avannaamiui caribiamiullu pissartanngorniunneranni peqataanerat arlalinnik pitsaasumik siuariarfiuvoq.
KNR-ip timersornermut ataqatigiissarisuat, Noah Mølgaard taama naliliivoq.
- VM-imut anngunniunnerit pingasut tulleriisillugit Kalaallit tamatigut siuariaqattaarput. Ukiut sisamat matuma siorna ujaminnanniunnermut anngutinngillat, ukiut marluk matuma siorna bronzinnapput, ukioq manna sølvinnapput. Taamaasillutik ukiut taakku sisamat ingerlaneranni siuariartortuarput, taannalu siuariartorneq pitsaasutut siunissami qiimmassaatitut atorsinnaalluarpaat.
Assammik arsartartut unammersuarnermi misilittakkat pissarsiatik atorluarsinnaagaat
Timersortartut Assammik Arsartartut Kattuffianni siulittaasup Carsten Olsenip isumaqataaffigaa.
- Una unammersuarneq nunatsinnut assammik arsarnerup silarsuaannut takutitsilluarnerusoq isumaqarpunga. Unammisut tamaviaarlutik sukataartut takusinnaalluarpagut. Iluminnillu attaveqatigiilluarpasipput. Tamannalu siunissami pitsanngorsassallugu pingaaruteqarluinnarpoq.
Kalaallit Puerto Ricomut marloriarlutik unammipput, unamminermi siullermi Kalaallit 26-23-mik ajugaapput. Ippassarli pissartanngorniunneranni 34-24-mik ajorsarfigai.
Sungiussisimaneq målimiittoq pingaaruteqarpoq
Kalaallit arsarnermi kukkuluttoqattaarnerat ajorsarnerannut peqqutaasoq Carsten Olsen oqarpoq.
- Arsartartoqatigiinni misilittagaqarnerpaasup måliniittunilu pitsaanerpaasup, Rinap, ullup siuliani Puerto Ricomut unamminerminni - ippassarnit iluatsitsifiginerusaminni - ajoqusernera peqqutaasutut nalilerallarpara. Ullumikkut assammik arsartarnermi måliniittoq pigaarutilipilussuuvoq. Tassalu ajoqusernera pissanganermik asartartullu arlallit arsakulannginnerannik akullugit unamminerup inerneranut aalajangiisuugunarput, taanna naliliivoq.
KNR-ip timersornermi ataqatigiissaarisuat Noah Mølgaard, unammersuartoqarnera tamaat oqaluttuuvoq, Kalaallit kukkuluttorpallaartut taanna isumaqarpoq.
- Eqqarsartaatsikkut piareersimannginneq taannaanerugunarpoq Puerto Ricomut ajorsarnermik peqqutaasoq. Kalaallit pitsaanerujussuarmik arsarsinnaagaluarput kisianni kukkusaqattaarnerit pissutaallutik isertitseriarnissamullu periarfissat atorluanngitsooqattaarneri pissutaallutik Kalaallit ajorsangaatsiarput.
Kalaallit arsarluarnerpaat
Pissartanngorniutivinneq naammassimmat unammersuarnermi arsarluarnerpaat saqqummiunneqarput. Taakkunannga Kalaallit arsartui pingasut toqqarneqarput.
Kalaallit arnartaasa assammik arsarnermi nunanut allanut unammisartui tassalu Lykke Frank Hansen saamerlermi tunorlermi, Josephine Gadgaard talerperlermi tunorlermi kiisalu Ivaana Holm titarnerup killinganiillaqqinnerpaatut toqqagaapput.
- Arsarluarnerpaatut toqqaanermi affangajai angullugit Kalaallinit inuttalerneqarnerat nuannaarutigeqaara, Carsten Olsen oqarpoq, itisiliillunilu:
- Arsartut allat aamma toqqarneqarluarsinnaakutsoorput ullormi tassani arsarluarsimagaluarpata. Arsarluarnerpaatullu toqqarnertut nunatsinneersut arlaqarmata pitsaaqaaq. Taakkulu tamanna angusinnaasimavaat arsartut tamarmik iligiilluarneratigut.
