Fight night: Kick boksningimi arnat pingaarnertut unammisuussapput

Greenland Martial Arts Event taekwondoimi, tilluunnermi aamma kick boksningimi unammineruvoq ukiut pingajussaa tallimanngornermi unnukkut Nuummi pissaaq.

Unamminersitsinerup taassuma ukioq manna pinissaani unammineq pingaarneq arnat unamminerat unnummi kingullertut inissinneqarpoq.

Unammisussat tassaapput kalaaleq Ivaana Mølgaard kick boksningimi oqimaaqatimini nunani avannarlerni pissartaq Danmarkimi pissartaasumut Jette Sejr Lundimut unammisussaq.

- Ilimagaara unammineq nuannersuullunilu pissanganumaartoq isiginnaartullu nuannisarluarumaartut, Jette Sejr Lund KNR-mut oqarpoq.

Taassuma aamma isertuutinngilaa unammisassaminut ataqqinninnini.

- Nammineq naatsorsuutigaara unammilluarnissara unammillerluarlugu aammalu ajugaaffigeriassallugu. Kisianni aamma nalunngilluarpara pikkorissuusoq, Jette Sejr Lund oqarpq.

Pissanganeq ajugaarusunnerlu

Ivaana Mølgaard Greenland Martial Arts Eventimi marloriarluni peqataareerpoq tamatigut ajorsartarluni. Maannali Danmarkimi najugaqarpoq qallunaat nunanut allanut unammisartuiniittut arlallit peqatigiiffeqatigalugit.

Taamaattumik Greenland Martial Arts Eventimi ajugaanermi ajorsarnermilu kisitsinik allannguerussuppoq.

- Nammineq eqqarsariaasera malillugu unamminermi aqutsinerorusuppunga. Nalunartoqartuaannarporli pisoqartuaannarlunilu. Ajugaanissara neriuutigaara aamma tamanna anguniarpara, Ivaana Mølgaard KNR-mut oqarpoq.

Maannalu Inussivik tallit nissullu atorlugit unammiffissatut piareersarneqarmat pissanganeq takkukkiartulerpoq.

- Pissangaammertarpunga ajugaarusunnerlu malugisarlugu, Ivaana Mølgaard oqarpoq.

Unamminerni allani taekwondomi tilluunnermilu unammisoqassaaq.

Pisoq KNR-TV-mi toqqaannartumik nalunaaqutaq 21:25-miit KNR 2-mi aallakaatinneqassaaq.