Tilluunneq: Frank Madsenip unammisassaata pissuserissaartoqarnissaa kissaatigaa
![Boksning: Frank Madsens modstander håber på fair kamp](/sites/default/files/styles/image_934x467/public/2023-11/IMG-5367.jpg?itok=0NFeiTY3)
Kalaaleq akissarsiutigalugu tilluuttartoq Frank Madsen Rumæniameersumut Octavian Gratiimut aqagu unnukkut Nuummi Illorsuarmi timersortarfimmi tilluutissaaq.
Tilluunnerit arfineq pingasuussapput unnullu naggaserlugu Frank Madsen Rumæniamiumut tilluutissaaq.
- Neriuppunga tilluunneq ileqqorissaarfiussasoq. Ajugaanissaq anguniassavara, kisianni aamma nalunngilara unammisassara pikkorissorujussuusoq, Octavian Gratii KNR-mut oqarpoq.
Immikkoortumi kingullermi unitseriassavaa
Frank Madsen aamma Octavian Gratii siornatigut tilluuteqatigeereerput. Frank Madsenip unammisassani Rumæniameersoq ajugaaffigereernikuuaa aammali ulorianarsinnaassusia nalunngilluarlugu.
- Unammisassara sakkortoorujussuuvoq siuarterniartuullunilu sakkortuumik tillussisartoq, tamakkulu tassa pinngitsoorniartussaavakka, Frank Madsen oqarpoq.
- Qanillinaversaarlugu pointinnanniarfigissavara qasuarlugu. Immikkoortumi kingullermi aalajangiisuusumik tilloriarumaarpara, kalaaleq tilluuttartoq oqarpoq.
Aatsaat siullerpaamik inunngorfigisamini Nuummi tilluuttussaavoq ilimasupporlu ilaquttaminit isiginnaarianillu allanit tapersersorneqarluarumaarluni.
Tilluunnerillu arfineq marluk allat aamma nuannersuujumaartut ilimasuppoq.
- Nuannersumik pikkusuttoqarumaarpoq. Uagullu unamminissarput sioqqullugu tilluunnerit allat aamma nuannerumaarlutik, Frank Madsen oqarpoq.
Tilluuttut unamminerit KNR2-mi aqagu unnukkut nalunaaqutaq 18.45-miit KNR2-mi isiginnaarneqarsinnaavoq.