Nunatsinni arnat assammik arsartartut sølvinnammata Naalakkersuisunit nersorneqartut
Kalaallit arnartaasa assammik arsaattartui, USA-mi pissanganartumik unammiartoreerlutik, uteqqammerput.
Amerika Avannarlermiut Caribiamiullu Chicagomi pissartanngorniunneranni, ajugaasut tulliullutik ujaminik pokalimillu sølvimik angerlaaseqqammerput.
Pissartanngorniunnermi kalaallit Puerto Ricomut unammipput. Tassani kalaallit 24-34-mik ajorsarput.
Anngunniunnermi taamaallaat gultinanniuttoqanngilaq, anngunniutivinnermimi ajugaagaanni VM-imut peqataanissamut qulakkeerinnittoqassaaq - taamannalu Puerto Rico-mit ajugaaffigineqarpoq.
AAMMA ATUARUK Kalaallit arnartaasa assammik arsartui VM-imut anngunniutilersut
Pakatsisoqaraluartoq nunatsinni arnat assammik arsartartut unammiuaarnerni aatsaat taama angusarissaartigipput, tamannalu pillugu assammik arsartartut Naalakkersuisunit Nuummi Hans Egedep illuanut ippassaq sapaammi qaaqquneqarput.
Tassani Naalakkersuisut siulittaasuata, Múte B. Egede-p, assammik arsartartut qujaffigalugillu pilluaqquai.
- Unammisartut tamassi, ullumi peqataanngitsut, sungiusaasut suleqataasullu tamassi pilluaritsi. Inuiattut ataatsimoortippatsigut, tulluusimaartillutalu. Ingerlalluaqqinnissassinnik kissaappassi - Tulliani VM-imut anngutissaagut, Múte B. Egede allappoq.
Nunatsinneersut unamminermi ingerlalluarput. Kalaallit Mexico-mut, USA-mut Puerto Rico-mullu unamminerminni ajorsanngiivipput.
Ajugaaniutivinnermi kalaallit Puerto Rico-mut unammipput. Tassami semifinalimi kalaallit 26-23-nik Puerto Rico ajugaagaluartut, aamma Puerto Rico ajugaaniutivinnermut annguppoq.
Ajugaaniutivinnermilu Puerto Rico angusarinneruvoq.