Meeqqat inuusuttullu nunatsinneersut Meeqqat Ataatsimeersuarnissaannut Nuummi katersuuteqqittut

Nunatsinni meeqqat inuusuttullu 25-t misigisimasaminnik avitseqatigiinniarlutik aalajangersimasunillu pitsanngorsaatissanik pilersitsiniarlutik Nuummi sapaatip akunnerata naanerani katersuutissapput.

Tamanna UNICEF Kalaallit Nunaata meeqqat inuusuttullu pisinnaatitaaffiinik pitsanngorsaanermik aamma taakkununnga nunatsinni sunniuteqarluarnissamik suliniuteqartoq, NAKUUSA aqqutigalugu aaqqissuussaani, Meeqqat Ataatsimeersuarnerat 2026-mi pivoq.

Ataatsimeersuarnermi Meeqqat Isummersorfiineersut misilittakkaminnik ingerlatitseqqinniarlutik, ataatsimut ajornartorsiutinik oqaloqatigiinniarlutik ukioq mannalu sammisaq pillugu angusassamik toraagaqarlutik ulluni marlunni katersuutissapput:

 “Iliuuseqarsinnaassuseq, meeqqanut aamma inuusuttuaqqanut siumukarnermik pilersitsisoq”, ukioq manna sammisaasoq, Meeqqat Siunnersuisoqatigiivi NAKUUSA tusagassiuutinut nalunaarummi allappoq.

Oqariartuullu ersarippoq: meeqqat inuusuttullu tusaaneqaannaratik iliuuseqartoqassaaq.

Misilittakkat piviusumik aaqqiissutissarsissutaassasut

Meeqqat inuusuttullu 13-init 17-inut ukiullit, nunatta immikkoortuini tamaneersut kommunineersullu suliniut aqqutigalugu nammineq ulluinnarni misilittakkatik pillugit isummersorlutillu ajornartorsiutaasunik iliuuseqarfigitikkusutaminnik suussusersiissapput.

Taakku namminneq inuunerminni, najukkaminni inuaqatigiinnilu ataatsimut qanoq allannguisinnaanerminnik misissuissapput.

Ataatsimiittarfimmit piviusumik iliuuseqarnikkut aaqqiissuteqarnissaq anguniagaavoq.

Meeqqat naggasiutigalugu politikerinut, inunnut tunngasunik sulialinnut nunatsinnilu meeqqanut inuusuttunullu allanut piviusumik aaqqiissuteqarnissamut siunnersuummik ataatsimut aalajangersaapput.

Taamaalillutik isiginninnerat inuiaqatigiinnut ilusilersuinermut aalajangiinissamut piviusumik sunniuteqarnissaa qulakkeersinnaallugu.

Politikerit meeqqat naligalugit ataatsimeeqatigineqassasut

NAKUUSA-p meeqqanut ataatsimeersuartitsinera 15-issaannik aaqqissuunneqassaaq.

Ukioq mannali allaanerusunik nutaartaqarpoq: Politikerit aalajangiisartullu meeqqanik qanimut oqaloqatiginninnissamut aggersarneqassapput.

Politikerit ukiuni kingullerni marlunni workshopertinneqarput, meeqqallu aalajangiisartullu akornanni meeqqat inuusuttullu oqaluuserisassatut toqqagaat pillugit 'ammalortunngorluni oqaloqatigiittoqarluni'.

Ukioq mannali 'meeqqat politikerillu akornanni suleqatigiinnerup pitsaanerulersinneqarniarput, taamaalillutik imminnut piffissaqarfiginerullutik imminnut ilinniarsinnaassapput', UNICEF Kalaallit Nunaannit suliniummi aqutsisoq, Tina Dam oqarpoq.

Kinguaariit akornanni oqaloqatigiinnerni nutaani ajornartorsiutit aaqqiissutissatullu siunnersuutit naligiimmik oqaluuserineqarsinnaanissaannut sinaakkutinik pilersitsinissaq neriuutigineqarpoq.

Nipit tamarmik naligiissinneqarlutik paaseqatigiinnerusoqalernissaa anguniarneqarpoq.

Politikerit meeqqat ukiuni kingullerni isummersuutigisartagaannit isumassarsitinneqangaatsiartartut, suliniummi aqutsisup oqaatigaa.

Ukioq manna qaninnerusumik oqaloqatigiittoqarneratigut tamatuma pitsaanerunissaa neriuutigineqarpoq.

- Politikerit meeqqanik peqataatitsinerup meeqqanillu sunniivigineqarnerup pingaassusaannik paasinninnerugunik suli pitsaanerussaaq, Tina Dam oqarpoq.

- Meeqqammi ullumikkut meeraaneq ilisimasaqarfiginerpaavaat, taanna oqarpoq.

Taamaammat politikerit meeqqat peqataatinneqarnerunissaannut tamatumalu pitsaanerunissaanut 'periarfissamik tigusinissaannut' tunngassuteqarpoq.

‘Nammineq inuunerminnut immikkut ilisimasaqartuupput’

Meeqqat peqataatinneqarnerisa qanoq pingaartiginera, UNICEF Kalaallit Nunaannimi suliniummi aqutsisup, Tina Damip erseqqissaatigaa:

- Takunninnerminnik ilumoortunik, sapiunnatik oqaluttuaminnik siunissamullu takorluukkaminnik tunniussaqangaatsiartarput. Namminneq inuunerminnut immikkut ilisimasaliupput – uagut inuiaqatigiinnik meeqqat inuusuttullu atugarissaarfigisaannik pilersitsissagutta taakku oqariartuutaat aalajangiisuussapput, Tina Dam tusagassiuutinut nalunaarummi oqarpoq.

Aaqqissuussisut naatsorsuuteqarluinnartut Meeqqat ataatsimeersuarnerat oqallinnerinnaanngitsoq erseqqissaatigaat. 

Oqalliffiuvoq, tassani isumassarsiat innersuussutinngortinneqartarput, tassanngalu meeqqat nunatsinni pitsaanerusumik inuuneqalernissaannut alloriarnerit siullit pilersinneqartarlutik.

- Meeqqat, attaveqaataasut aalajangiisartullu Nuummi ulluni marlunni katersuunnissaannut nukissaqarluartut, oqaloqatigiinnissat ilisimasallu nutaat qilanaagaagut, taakku allapput.

Tina Damip meeqqat sammisassanik nammineq toqqakkaminnik oqaluuserinninnissaat qilanaaralugu oqaatigaa.

Taassuma meeqqat qanoq pimoorussitigalutik piviusorsiortumik aaqqiissutaalluarsinnaasunillu siunnersuutissarsiortarnerat nuannarilluinnartarpaa.

- Inuiaqatigiinnut naleqqulluartunik pitsaalluinnartunik oqariartuuteqartarput, taanna oqarpoq.