Meeqqat Isummersorfii avatangiisit peqqinnartuunissaannik piumasaqartoq
Meeqqat ukiumoortumik ataatsimeersuartinneqareernerisa kingorna innersuussutit erseqqissut, meeqqat kommuninut naalakkersuisunullu tunniussassatik piareerpaat.
Meeqqat ataatsimeersuarnissaannut 2025-mi sinerissamiit meeqqat 22-t ataatsimeersuarnermut peqataajartorlutik Nuummi katersuupput.
Nakuusa tusagassiuutinut nalunaarummi taama allappoq.
- Meeqqat ukioq manna pimoorussilluarnerat malugigipput isumaqarpunga, ukioq mannalu ataatsimeersuarnermi qulequtarineqartumut avatangiisit toqqissisimanartut peqqinnartullu, ilaannut sunniuteqangaatsiarput, Nakuusami suliniummi aqutsisoq Mie Skou Larsen KNR-imut oqaluttuarpoq nangillunilu:
- Tamanna avatangiisit qanoq pitsaanerulersinneqarsinnaaneri peqqinnarnerusinnaaneri toqqissisimanarnerusinnaaneri pillugit meeqqat akornanni nuannersunik oqallitsitsivoq, taanna oqarpoq.
Meeqqat Isummersorfii, nunami tamarmi meeqqat atugaasa pitsaanerulersinneqarnissaannut pisariaqarsorisaminnut aaqqiissutissatut siunnersuutinik arfinilinnik ataatsimoorlutik tunniussaqarput.
Meeqqaat innersuussutitik nutaat arfinillit kommunit borgmesteriinut Meeqqanut Inuusuttunullu Naalakkersuisumut Mads Pedersenimut marlunngornermi ulloqeqqata kingorna tunniuppaat.
Tassani suleqatigiit pingasuullutik innersuussutit atsioqatigiissutigissavaat.
Tusarnaartigut
Nakuusami meeqqat isummersorsinnaanermik ilinniartinneqarnissaat anguniagaavoq.
- Taamaaliornermi imminnut tatigilertarput, aperineqartillutillu isummaminnik annissinissaminnut sapiissuseqarnerulertarlutik. Meeqqanik ineriartortitsisartoq malugisinnaavarput – taakkualu innuttaasunngussapput siunissami oqartussaaqataallutik, suliniummi aqutsisoq oqaluttuarpoq.
Meeqqat isummersuutaat suunersut aperinissaat eqqaamasassagipput taanna oqaluttuarpoq, taakkumi inuiaqatigiit qanoq ittuunissaannut aamma aalajangeeqataasussaammata.
- Meeqqanut aperigaangatta, uagut inersimasutut taakku isumaat pingaartikkivut misigisarpaat, meeqqat pillugit isumaqatigiissut naapertorlugu meeqqat tusaaneqarnissartik pisinnaatitaaffigaat, pisinnaatitaaffeqarnerallu pillugu pimoorussigaangatta akisussaaffimmik tamatumunnga malinnittumik tigusisarnerat malugisarparput, Mie Skou Larsen oqarpoq.
Sumiiffiusinnaasut eqqiluitsut toqqissisimanartullu, sumiiffiusinnaasut amerlanerit, sammisassat amerlanerit, imigassallu nuanniitsunik sunniutai meeqqanullu ataqqinninneruneq Meeqqat isummersorfiisa oqaluuseraat.
- Avatangiisit peqqinnartut ukioq manna qulequtarineqartoq pillugu, imigassaq sunngiffimmilu sammisassat oqallitsitsingaatsiarput. Qulequtaq siammasilaarpoq, kisianni aamma tamanna nuna tamakkerlugu illoqarfiit meeqqanut peqqinnarnerullutillu naleqqunnerusut pilersinniarneqarsinnaaneri pillugit isummersuuteqarlutik oqallisiginerinut periarfissiivoq, Mie Skou Larsen naggasiiivoq.
