Trumpip Kalaallit Nunaannut iliiusai atugarliornerulersitsisut
Amerikamiut præsidentiata Donald Trumpip Kalaallit Nunaannut tunngatillugu oqaaseqarnerata kingunerisaanik tarnikkut atugarliornerusoqalerpoq.
Kalaallit Nunaanni Peqqissusermik Ilisimatusarfiup aamma Ilisimatusarfiup misissuinerata nutaap tamanna takutippaa.
- Innuttaasut tarnikkut peqqissusaat atugarissaarnerallu siusinnerusukkut misissuinernut sanilliullugit ajorseriagaatsiarsimasut takusinnaavarput. Tarnikkut atugarliornermik inuunerullu pitsaannginneruleranik misigisimasut siorna misissuinermut sanilliullugu amerlanerujussuupput, Kalaallit Nunaanni Peqqissusermik Ilisimatusarfimmit professori, Peter Bjerregaard tusagassiuutinut nalunaarummi oqarpoq.
Innuttaasut tarnikkut atugarliornermik ersiuteqartut siorna misissuinermit 7 procentimit sisamariaataat sinnerlugit amerlillutik ukioq manna 31 procentiupput.
Innuttaasullu 76 procentiisa Amerikamiut præsidentiata nunatsinnut tunngatillugu oqaaseqartarnera ingasanngitsumik sakkortunerusumilluunniit ernumassutigalugu oqaatigaat.
Inuunerup pitsaassusaa ajorseriarujussuartoq
Misissuineq nutaaq ukioq manna januaarimi februaarimilu suliarineqarpoq, inuillu katillugit 308-t apersuinermut peqataapput.
Peter Bjerregaardip oqarnera naapertorlugu, misissuinerup nunani politikkikkut akerleriinnerit qanimut qanoq misigineqartarnerat takutippaa:
- Ernumanerit nalorninerillu qanoq sukkatigisumik inuit ulluinnaannut sunniuteqarsinnaanerat misissuinerup takutippaa.
Aammami kalaallit 82 procentiisa USA-p qanoq ilioratarsinnaaneranik ernummateqarnerup ulluinnarmi inuuniarnerminnut sunniuteqarnerarpaat.
Aammattaaq inuuniarnerup naleqassusaa 20 procentpointimik ukiup ataatsip ingerlanerani ajorseriarpoq taamaalillutik 64 procentit taamaallaat ullumikkut inuunertik pitsaasuunerarpaat.
Nakuussuseq ataqatigiinnerlu
Peqqissutsimut inunnullu Innarluutilinnut Naalakkersuisup Anna Wangenheimip (D),misissuineq nutaaq isumalluarfigaa.
Misissuineq innuttaasut nukittunerannut ataqatigiinnerannillu ersersitsivoq, taanna Facebookimi allappoq.
Inuit amerlanerusut, assersuutigalugu pinngortitamiinnerminni imaluunniit ilaquttaminnik ikinngutiminillu oqaloqateqartarnerminni imminnut paarinerusut misissuinermi akissutit takutippaat.
- Kalaallit Nunaanni pinngortitamiinneq aamma qaniginerpaasatsinnik allanillu oqaloqateqarneq ilaatigut nukittuffigigipput aamma takusinnaagatsigu. Ataatsimoornitsinni tamakku ilaatigut nukittuffigaagut, Anna Wangenheim KNR-imut oqarpoq.
