Kalaallit arnartaasa assammik arsartui VM-imut anngunniutilersut
Kalaallit arnartaasa assammik arsarlutik nunanut allanut unammisartui maanna aappassaanik unamminerminni marloriarlutik ajugaapput, maannalu Puerto Ricomut unamminissaq tullinnguuttoq pissangassutaasussanngorpoq.
Kalaallilli arnartaat nuannateqisut, sungiusaasup ikiortiat Akutaaneq Kreutzmann KNR-imut oqaluttuarpoq.
AAMMA ATUARUK USA-mut unamminnginnermi naliliisoq: Kalaallit arsalerillaqqinnerullutillu periaatsinut eqqarsallaqqinnerupput
Nunatsinneersut Puerto Ricomeersullu finalimut anngutereerput.
Tassalu taakkut arlaat VM-imut anngunnissartik aqagu qulakkeertussaassavaat. Ajugaasullu Spaniamut VM-eriarumaarlutik.
- Finalimut anngunneq nuannersorujussuarmik tiguneqarpoq, Akutaaneq Kreutzmann oqarpoq nangillunilu:
- Kisianni aamma eqqaamassavarput suli unammineri marluupput, aammalu unammineq kingulleq pingaarutilerujussuulluni. Nuannaaqaagut kisianni suli naammassinngilagut, taanna oqarpoq.
Ajugaanissarput tamaviaarutigissavarput
Unnugu unamminermi inernerit kinguneqarpallaartussaanngikkaluartut, eqqarsartaatsikkut piareersarnissamut iluaqutaassasut, Akutaaneq Kreutzmann oqarpoq.
- Soorunami Puerto Ricop unammisai isiginnaassavagut aamma isiginnaareernikuuagut qanoq arsartariaaseqartut. Nalunngilarput qanoq iliorniarnersut, kisianni uagut aamma immitsinnut inissilluarniartussaagatta, taanna sungiusaasoqatigalu taakku uagut isumaginiarsariumaarpagut. Taava arsartussat unamminissartik eqqarsaatigiinnassagaat. Kisianni nalunngeqaagut qanoq arsartariaaseqarnersut taannalu aamma piareersarfigilluassavarput.
Puerto Ricomut ajugaaniarussi sunaana ilissi nukittuffigisariaqarissi?
- Assersuinerput taamatulli ingerlasariaqassaaq, sakkortuumik. Taavalu saassussinermi uku målinut isertinniarsarisagut amerlanerpaartaat isertariaqassapput.
Ullut sisamat uniffeqaratik unammisut
Kalaallit arnaartaasa assammik arsarluni nunanut allanut unammisartui amerikap avannaamiunu Caribiamiullu VM-imut anngunniunneranni ullut tulleriit sisamat uniffeqaratik unammisussaapput, tamannalu piareersimaffigigitsik, Akutaaneq Kreutzmann oqarpoq.
- Isumaqarpugut aamma uagut piareersimaffigilluarnikuullutigut taanna ullut taakku sisamat unamminerit. Aamma takusinnaavarput qasulaarput, kisianni Puerto Ricokkut aamma taamaapput, unamminerit amerlasuujupput aamma qasupput. Taamaammat uani unamminermi takutittorujussuussavaat kikkut taktikkimia aammalu timikkut nukittunikkut immaqaluunniit qasujaassusikkut takutissagaat kikkut ajugaajumaarnersut.
Kalallit Puerto Ricomut unnugu nalunaaqutaq arfineq pingasunut KNR TV-kkut toqqaannartumik malinnaavigineqarsinnaapput.
