USA-mut unamminnginnermi naliliisoq: Kalaallit arsalerillaqqinnerullutillu periaatsinut eqqarsallaqqinnerupput

Kalaallit arnartaat assammik arsarnermi nunanut allanut unammisartui amerikap avannaamiut Caribiamiullu VM-imut anngunniunnerannut unammeqqittussanngorput.

Ippassaq Mexicomut unamminerminni kalaallit ajugaapput unnugulu USA-umut unammisussanngorlutik.

AAMMA ATUARUK Kalaallit arnartaat assammik arsarnermi nunanut allanut unammisartui Mexicomut ajugaasut

Tassunga tunngatillugu Kalaallit arnartaat assammik arsarnermi nunanut allanut unammisartuisa ajugaanissaasa qanoq ilimanaateqartiginera KNR-ip timersornermi ataqatigiissaarisuanut Noah Mølgaardimut oqaloqatigaarput.

- Ippassaq USA-p taavalu Puerto Ricop unamminerat naatsorsuutigissagutsigut Kalaallit ajugaanissaminnut periarfissagissaarput. Kalaallit arsalerillaqqinerupput taavalu periarnissamut eqqarsallaqqinnerullutik. Taavalu USA-p arsartui inuusoqigamik Kalallillu arsartui misilittagaqarlualereernikuullutik, taamaattumik Kalaallit unnugu ajugaanissaminnut periarfissagissaarput, Noah Mølgaard oqarpoq.

Unammineq ataatsimut isigissagaanni Kalaallit ajugaanissaat qanoq ilimanaateqartigiva?

- Tassa Kalaallit unnugu taava tassa finalernissartik qulakkeertussaavaat, taava finalimi ilimanarpoq Puerto Rico unammissagaat. Taava kisianni Puerto Rico ajugaaffigissagunikku kukkunerit ikinnerpaaffissaminiittariaqarput, malunnarami Perto Ricop sakkuata ulorianarnera tassaasoq sukkasuumik saassussinerit, Noah Mølgaard oqarpoq.

VM-eqataasinnaanermut aalajangiisussaq

Kalaallit USA-mut unnugu ajugaassappata, unamminerni tulleriinni marlunnik ajugaallutik taava finalimut anngunnissartik isumannaassavaat.

Kalaallit ajugaassagunik Spaniami VM-ertoqarnissaanut anngunnissartik qulakkiissaavaat. Taamannalu anguniarunikku finalimi tamaviaartariaqartut Noah Mølgaard oqarpoq.

Kalaallit USA-mut unnugu qulinut unammissapput taakkulu KNR1-imi isiginnaarneqarsinnaapput. Unammineq Amerikami nalaagaaffiup Chicacop ilaani Illinoisimi ingerlanneqassaaq.