Ammassalik Kommune nakkutilliisoqarfimmit tikeraarneqassaaq
Kommuni 18,4 millioni koruuninik attartugassarsiniarluni qinnuteqareerpoq maannamulli akuerineqassanersoq oqaatigineqarsinnaanngilaq.
Kangia Kitaata kommunissaani ikaarsaariarnermut ataatsimiititaliap aningaasaqarnermut ataatsimiititaliaani ippassaq ataatsimiinneq aningaasaliinermik kinguneqanngilaq.
Ilimanarporli Ammassallip kommunia Kommunenik nakkutilliisoqarfimmit tikeraartoqassasoq. Nakkutilliisoqarfiup paasiniassavaa Ammassallip kommuneata aningaasaqarnera qanorpiaq innersoq.
Kommunenik nakkutilliisoqarfimmeersut sapaatip-akunnerata tulliani Tasiilamukassangatinneqarput, misissuisoqareerpallu Ikaarsaariarnermi ataatsimiititaliaq peqatigalugu iliuusissat piareersarneqassapput.
Imaassinnaavoq Ammassallip Kommuneata aningaasaqarnera Namminersornerullutik Oqartussanit nakkutigineqalersoq, soorlu Qaanaami aningaasaqarneq ajorsilluinnarmat siornatigut taama pisoqarsimasoq, taama radioavisimit tusarfipput oqaluttuarpoq.
Inatsisit malillugit kommunerujussuarnut ikaarsaariarnermi ataatsimiititaliat aatsaat januaarip aallaqqaataani 2009-mi aningaasaqarnermut tunngasuni aalajangiisinnaasssuseqalissapput, taamaammat Ammassallip Kommunea pillugu maanna iliuuseqarsinnaanngikkallarlutik.
Kangia Kitaata kommunessaani borgmesterinngortussaq Asii Chemnitz Narup ullumi oqaaseqartinniaraluaratsigu iluatsitsinngilagut, radioavisimulli ippassaq oqarpoq, soorunami aaqqiissuteqartoqarumaartoq.
