Amerikamiut kiisami anneruniarunnaarput
Amerikamiut Issittumi Siunnersuisoqatigiinni akerlilersuinerat tupaallannartumik qaangiuppoq. Siunnersuisoqatigiinni ukiuni arfinilinni tulliuttuni silaannaap allanngoriartorneranut ajornartorsiutit sammisani pingaarnerpaalissapput, tassa Norge, Danmark aamma Sverige siulittaasuutitaqalerpata.
Silaannaap allanngoriartorneranut ernummateqarnerup naalakkersuinikkut akerlilersorneqarneranut taarsiullugu iliuuseqarnissaq pingaartinneqarnerulersussanngorpoq. Tamanna ullumi Ruslandimi Issittumi Siunnersuisoqatigiit ataatsimiinnerata kingornagut oqariartuutigineqarpoq. Ataatsimiinneq illoqarfimmi Salekhardimi ingerlanneqarpoq. Ataatsimiinnermi peqataallutik Nunani Avannarlerni, USA-mi, Canadami Ruslandimilu avatangiisinut ministerit.
Ataatsimiinnermi isumaqatigiissutitut nalunaarusiami ministerinit akuersissutigineqartumi silaannaap allanngoriartornera pingaarnersaatinneqarpoq. Taamaattorli pineqartoq sapaatip-akunneri marluk matuma siornatigut atorfilinnit ataatsimiissutigineqaleqqaarmat taamatut inerneqarnissaa ilimagineqarsimanngikkaluarpoq. Danskinut naammaginartumik aalajangersaasoqarnissaa iluatsipparput, danskit avatangiisinut ministeriat Connie Hedegaard ilisimatitsivoq.
- Tamanna sioqqullugu isumaqatigiissutitut nalunaarusiami oqaatsip silaannaap pissusaata taaneqarnissaata ilaatinneqanngitsoornissaa annilaanngatigineqarsimagaluarpoq, kisianni isumaqatigiissummi silaannaap allanngoriartornera sallersanngortinneqarpoq. Silaannaap allanngoriartorneranut naleqqussartoqaannarani, allanngoriartornerup iliuuseqarfiginissaa isumaqatigiissummi allanneqarpoq, Connie Hedegaard tusagassiorfimmut Ritzauimut oqarpoq.
Taamaalilluni Amerikamiut Issittumi Siunnersuisoqatigiinni silaannaap allanngoriartorneranut tunngasunik sammisaqarusunngilluinnarnerat qaangerneqarpoq.
Isumaqatigiissutitut nalunaarusiaq atorlugu Nunat Avannarliit silaannaap pissusaa ukiuni tulliuttuni arfinilinni siunnersuisoqatigiinni pingaarnersatut samminissaanut periarfissaqalerput. Siulittaasuutitaqarfik Norgip ullumikkut Ruslandimit tiguaa, tulliullutillu siulittaasuutitaqartussat tassaapput Danmark aamma Sverige. Nunat taakkua pingasuullutik Norgip avannaani Tromsømi ataatsimut allaffeqarfimmik pilersitsiniarlutik aalajangiuppaat ukiunilu tulliuttuni arfinilinni silaannaap allanngoriartorneranut tunngasumik ajornartorsiutit pingaartinneqarnerulissapput, avatangiisinut ministeri Connie Hedegaard neriorsuivoq.
- Silaannaap pissusaa pingaartillugu sammiinnavittariaqarparput iliuuseqarfigisinnaasavullu iliuuseqarfigalugit. Taamaaliornitsigut minnerunngitsumik Kalaallit Nunaat pingaartillugu sammissavarput, tamaanimi issittumi silaannaap allanngoriartornera ersarinnerpaanut ilaammat, avatangiisinut ministeri oqarpoq.
Qaammatip tulliani nunarsuarmi naalagaaffiit tamat silaannaap allanngoriartornera pillugu Kenya-mi ataatsimiissapput. Avatangiisinut ministeri oqarpoq Issittumi Siunnersuisoqatigiit silaannaap allanngoriartorneranik pingaartitsilernerat ataatsimiinnermut iluaqutaassasoq.
