Allagaammi takutsaaliukkami: Kangerlussuaq sakkutooqarfiulissaaq
Danskit illersornissamut ministereqarfiani atorfilittat Issittumi Sakkutooqarfimmut tunngatillugu kissaataat pingaarnersiorlugit allagaammi takutsaaliukkami allaqqapput.
Allagaammik takutsaaliukkamik aqqanilinnik qupperneqartumik anngussivigineqarsimasoq, TV 2, taama ilisimatitsivoq.
Kangerlussuaq sakkutooqarfinngortinneqassasoq, atorfilittat ilaatigut innersuussutigaat. Tamanna Nuummi Ilulissanilu mittarfissuaqalereeriarpat pissasoq kissaatigaat.
Danskit illersornissamut ministereqarfianeersumik tamanna pillugu oqaloqateqarniaraluarpugut, oqaaseqartoqarumananili.
Issittumi sakkutuuliinerulersaartut
1,5 milliardit koruuninik Issittumi nakkutilliinerunissamut aningaasaliineq
Folketingip illersornissaq pillugu isumaqatigiissutitaaq 2018-imi akueraa. Tamatuma saniatigut 4,8 milliardit koruuninik Illersornissaqarfimmut 2023-p tungaanut aningaasaliinissaq isumaqatigiissutaavoq.
Partiit illersornissaq pillugu isumaqatigiissusiortut sualummik Atlantikup Avannaani Issittumilu 2023-p tungaanut nakkutilliinerunissamut saniatigut 1,5 milliardit koruuninik 2019-imi aingaasaliipput.
Isumaqatigiissut taanna Issittumi Piginnaasanik Annertusaanermik (Arktis Kapacitetspakke) atserneqarpoq. Suliniummi uku ilaatigut ilaatinneqarput:
- Kalaallit Nunaanni timmisartuaqqat ungasianiit aquttakkat nakkutilliissutit (750 mio. kr.)
- Qaammataasatigut nakkutilliineq (85 mio. kr.)
- Kalaallit Nunaata sineriaani radarit (20 mio. kr.)
- Kalaallit Nunaanni illersornissamik ilinniarfiliorneq (50 mio. kr.)
Atorfilittat aamma allanik Issittumi sakkutuuliinerunissamut tunngasunik kissaateqarput.
Siriusip alapernaarsuisui piginnaanertusaaqqaalersaarput. Tamannali sunerpiaq imaqassanersoq allagaammi takutsaaliukkami taaneqanngilaq.
- Politikerit Issittumi nunap ilaanik aqqartartunillu nakkutilliissutissanik Boeing P8 Poseidoninik timmisartorsuartaarnissamut aamma aningaasaliissuteqalersaartut allagaammi takutsaaliukkami ersertoq, TV 2 allappoq.
Allagaammi takutsaaliukkami innersuussutit Issittumi Piginnaasanik Annertusaanermik taallugu illersornissaq pillugu isumaqatigiissummut naapertuupput.
Atlantikulli Avannaani Issittumilu umiarsuarnik alapernaarsuutitaalersaarnertik taamaatiinnarlugu sakkutuut imarsiortuisa umiarsui nakkutilliissutit sisamaasut Thesitullu angitigisut nutartertilersaaraat, atorfilittat innersuussutaanni erserpoq. Umiarsuit taakku Issittumi ukiuni 30-nit ikinnerunngitsuni nakkutilliissutaareerlutilli nungullarsimalerput.
AAMMA ATUARUK Danmark nunatsinni nakkutilliinerorusuttoq
Issittumi Piginnaasanik Annertusaanermik isumaqatigiissut Atlantikup Avannaani Issittumilu nakkutilliinerunissamut atugassanik 1,5 milliardit koruuninik aningaasaliissuteqarnermik ilaqarpoq. Nunatsinnilu timmisartuaqqanik ungasianiit aquttakkanik nakkutilliissuteqalernissaq, sinerisssami radareqalernissaq, qaammataasatigut nakkutilliinissaq nunatsinnilu illersornissamik ilinniarfiliornissaq isumaqatigiissummi tassani illersornissamut tunngasumi ilaatigut ilaatinneqarput.
Isumaqatigiissut taanna Danmarkip nunattalu siorna maajimi atsiorpaat.
Illersornissaq pillugu nutaamik suli isumaqatigiissusiunngitsut
Kangerlussuup siunissaa suli nalunarallarpoq.
Nuummi Ilulissanilu mittarfissuassat 2024-mi ammassasut nalunaarutigineqareersorli, Kangerlussuup siunissaa ernummatigineqalerpoq.
Danskillu naalakkersuisui illersornissaq pillugu isumaqatigiissutissatut siunnersuuteqartinnagit, Kangerlussuup siunissaa nalunarallartuassaaq. IlIllersornissaq pillugu isumaqatigiissut Sakkutooqarfik pillugu anguniakkat tunngavissallu pillugit politikkikkut isumaqatigiissutaavoq.
Danskit partiivi illersornissaq pillugu pilersaarutit malillugit aasartinnagu isumaqatigiissusiussapput.
Nunarpassuarni illersornissamut politikkit akornuserneqarnerannik kinguneqartumik Ukrainemi sorsunneq Issittumi sakkutuuliinerulersaartoqarneranut peqqutaaqataavoq.
